Phra ngut ki MP ka liang pyrchah ka Rajya Sabha da chah Suspend namo chah pyndam ki chi tayaw ynne i step hadien wa da mih i kulmar ynnin ka sngi heipor wa mynjur yaki artylli ki Bill heiyatoh wa i rep i riang tangwa da kyntait ki wow mih napoh ka dorbar. Ki MP kiwa chah Suspend toh u yong ka TMC u Derek O’Brien wa Dola Sen, u yong ka AAP u Sanjay Singh, u yong ka INC u Rajeev Satav, Ripun Bora wa Syed Nasir Hussain, CPI(M) u KK Ragesh wa u Elamaram Karim, kiwa da leh yei kaam wa ym yahap hapoh Parliament.
I wym bien kini wow mih, da wanrah ko yei pynsangeh boonsien yaka Rajya Sabha hadooh wa hap wow pynkut noh yaka yong ynne ka sngi. “Nga da sñiawsih O yeiwa jia ynnin wei da man ko leh ka sngi wa sih iwa ym ye de wow pyrkhat,” da ong u Rajya Sabha Chairman, Venkaiah Naidu.
Da ong u wa ki dkhot da noh da pakhot ki yaki kot, da kynjroi ki yaki Microphone hadooh wow maham ya u Deputy Chairman u Harivansh Singh wei wow klam pynkhor ya oo.
“Nga da pybna O yei pyrtuid u Derek O Brien. Sñiawbha mih napoh ka yung dorbar,” ong u Naidu katwa dang pynbna u yei pyrtuid ki MP kiwa da chah Suspend. Tangwa ym em uwi leh uwa mih.
U Sanjay Singh wa u Rajiv Satav ynnin da ku ki hajrong ka miej u Secretary General wa em hapyrdi ka yung dorbar, u Derek O’Brien da kaweh u yaka Rulebook hakhmat u Chairman wei da pyrchang u wow pynjæd ka katwa kiwi won da kynjroi ki yaki Microphone na ki thaw wa em ki. Em leh kiwa da pynjæd yaki Bill kiwa da wanrah.
Ka liang pyrchah kawa duna bru wow pyrchah yei lai kini ki Bill chakhmat, da dawa ki wow phah ya kini ki Bill wow lai ki cha ka Select Committee yow pait bniah yaki. Da paan ki leh wa yaka yatai u pteiñ ko hadooh ynne ka sngi , heiwa u Harivansh Singh da kyntait u wei da chah u ya u Union Agriculture Minister u Narendra Singh Tomar wow pteiñ u yei jubab chwa wow sdang ya i Vote.
I awri da joor i hadien wa ka liang pyrchah da dawa ki deiwa pynman yaka thap Vote ym toh deiwa yakbai iwa da chah kyntait biang heiwa ki liang pyrchah da tia ki cha u Chairman hadooh wow pyrchang wow chim ya u Microphone yong oo.
Kamwa 50 ngut ki MP ynne da pyrchang ki wow wanrah yaka No-confidence Motion pyrchah ya u Harivansh Singh kawa da chah kyntait ynne hi ka sngi.
