Shillong: Kawi ka kari sorkar wa em ya u Number ML 01 8602 kawa pynemkaam da u District Social Welfare Officer da chah thang diñ ko ynne ka sngi ha ki bru wym ye u tipmit ha yaw Mawkyrwat, South West Khasi Hills District, wei kani ka kari da iñ boon ko na ki bynta wa cha khmat na i liang wa chong uwa yah.
Hawa yaklam wa u Superintendent of Police ka South West Khasi Hills, u Maxwell Syiem da pyntip u wa ini da jia i heipor 3:30 noh chariñ ka sngi, katwa utai u sahep uwa dang em Duty ha katai ka yaw dang booh u yaka kari ha iwi i thaw, ha i por wym poi pyrkhat da wan mih 3 ngut ki bru kiwa tymmoh yei dur ki, kiwa da lai toor cha katai ka kari deiwa tympiah chwa yaka yit neiliang wa chong uwa yah wei hadien itæ da thang diñ wei yut noh ki wut na katai ka thaw hadooh wa ym chemdien de.
Katkam i pyntip u SP, neiliang u District Social Welfare Officer, u L. Lyngdoh da ujor u wut wut cha ka Mawkyrwat PS, wei ki pulit kattæ dang pynman ki yaka takit wow chem yaki damok wa emkti.
Hadien ini i jia, neiliang ka Officers Club yong ka South West Khasi Hills District da pynrem joor hajrong i chah pynsih katai ka kari wa da pynemkaam da u sahep uwa da chah thung kam u Executive Magistrate wa pait ya ki kaam næ Duty COVID-19 ha katai ka District, khamtam hapyrdi i dooh thiah dooh dem wow pait ya i lai bait lai ryntih yong ka yaw wei wow pait wa ki bru kiwa psiah wa mih deilang wa kiwa chong yaw bood ki yeiwa phah yong ka sorkar neibynta wow khanglaad wa u khñiang COVID-19 ym yoh u wow psiah chapoh ka District.
