Katkam wa pyntip ki pulit, kawi ka bru wa tip kam ka S. Kharkongor da ujor ko wa haka 7 tarik uni u bnai da yoo ko ya iwi i Advertisement lyngba ka Online Shopping ka Quikr.com heiyatoh wow dai ya uwi u ksaw daka Cargo Pet Transportation Agency heiwa da Phone ko ha u Number wa da booh ha i Advertisement wei da su ko T. 1,84,000 lyngba ka Net Banking ha kawi ka SBI Account wa pyrtuid Syntyche Meheune wa haka HDFC Account yong u Anil Kumar Ram. Tangwa hadooh wa lai e ko yaka ujor, kani ka Agency ym pu em li booh ko ya u ksaw wei da paan ma paan poisa ki ka.
Haka 27 tarik won uni u bnai, u G.L. Passah da ujor u wa haka 21-10-20 da thied u ya uwi u Drone lyngba Online haka India Mart wei da su u T. 1,28,750 cha ka Bank Account yong uwa dai tangwa hadooh katni ym pu em yoh u yei tiar.
Ha kiwi won kiwa jia, haka 18 tarik uni u bnai, ki pulit hadien wa yoh yutip ki da iwa tikna, da kem ya u Bilgrang S Sangma (28 snem) ha Rongkhon, Tura. Hadien ini da lai kynreh ki yei yung u ha Dakopgre, Tura wei da chem ki ya 589 ki kuli dawai drug wa tip kam i Yaba.
Ha ka 27 tarik uni u bnai heipor 5:30 i janmiet, ki pulit hadien wa yoh yutip ki, da kem ki ya kawi ka kari Maruti Swift (AS-01-AQ-7495) wa yah da u Anton H Thangminliana ha Mawiong View Point, wei napoh ka kari da chem ya 14 tylli ki synduk sabon wa em 150.26 gram wa suba toh i Heroin.
