Jowai: Ka dorbar chnong ka chnong Mowkaiaw ha West Jaiñtia Hills District da lehbor wei da knieh yabor ki ya ki kpær yong ki le tylli ki manyung kiwa kynthup na ka chnong Mowkaiaw wa kawi na ka chnong Kyrwen.
Kitai ki tre thaw kiwa kynthup ya ka kong Aniyan Phawa, ka kong Adala Shadap kiwa naka chnong Mowkaiaw wa ka kong Marbires Lyngdoh na ka chnong Kyrwen da chah thombor ki ha ki paidbah ka chnong Mowkaiaw heiwa da kamtre ki ya katai ka kpær rep jhoor yong ki kawa em ha Kyrwen.
Kitai kiwa rep da khana ki wa kitai ki kpær toh ki thaw ki bhaw wa i hok yong ki wei ki da rep ki ha kitai ki thaw nadooh yongrim da boon pateiñ wei da hiar i man tre ya i thaw katkam ka riti dustur.
Tangwa syndet syndet ha ka 21 tarik u bnai wa da dep ki bru ka chnong Mowkaiaw hapoh i yahkhmat u Waheh Chnong u ma Lovingson Laloo deilang wa ki paid u da wan pynjet pynpra ki ya katai ka kpær wa ya ki jhur ki jhep wa rep ki ha kini ki thaw.
Kini ki paid yong u Waheh Chnong da wan hiar ki hadooh 7 tylli ki truck wa kattu katni ki kari khian yow pynpra ya kiwa ker, ki morcha wei da ah da pam ki ya ki dieñ ki siej, wei da khloh ki ya ki salah, saru wa kiwi kiwi kiwa rep ha waroh le tylli ki kpær ka kong Aniyan Phawa, kong Adala Shadap wa ka kong Marbires Lyngdoh.
Ka kong Ailem Phawa toh ka payu waheh ka kong Aniyan Phawa kawa chong wa sah ha chnong Kyrwen. Da khana ko waka rep wai ko ha i kpær yong ka kong Shadap wei kamjooh leh ka rep ko ya ka kpær yong ka diah ki wei ha i por wa wan utai u Waheh Chnong ka Mowkaiaw ka dang rep ko ha kitai ki kpær.
“Nga da pyrchang u yaklam wa ki wei wow khang ya ki, tangwa ym ap ki wei da kyriaw ki yow leh bait deibor.”, ong kani ka manbei.
Kitai ki 3 tylli ki kpær em ki ha i thaw wa tip kam ka Mahalein hapoh u pood u ang ka chnong Kyrwen wei nadooh u snem 2012 da yoh ki ya ka dulir khyndaw na ka ophis JHADC deilang wa i mynjur u Dolloi ka Elaka Raliang.
Katkam ka Land Holding Certificate yong ka kong Aniyan Phawa da pynyoo che wa ya katai ka thaw da ong wa toh i hok yong ka, katkam ka LHC No. 157 of 2012 na ka JHADC.
Ini i wan pynjæt tympra ya katai ka bri rep yong kitai ki warep da ktah joor ko ya i yoh i kot yong ki neibhah ki da dep pynllut ki chiboon yow rep ha katai ka thaw.
“I dap i da i sñiawsih wa khroo neibhah i da dooh nong lut i ha uni u snem”, ong ka kong Ailem Phawa.
“Nga da wan yachem markhmat wa u Waheh Chnong, tangwa ong u wa hanlada biang kot biang sla phi leh, ym yoh pho ka ki i tai i thaw”, ong ka kong Aniyan.
Chooh chooh da pyntip leh wa da dep wan kyrpad ya u Dolloi yow yarap hei yatoh wa ini chah knieh bor i thaw rep tangwa neilaing u Waheh Chnong ym bien u pynbait yoosar wa kwah u ki ya oo itai i thaw.
Neliang kitai ki warep kyrpad leh ya ki seiñbhalang ka ri-loom Jaiñtia yow yarap ki heiyatoh wa ini i chah thombor ki thaw ki bhaw yong ki ha utai u Waheh Chnong wa ki paid yong oo.
Discussion about this post