Heiyatoh wa i chah tooh sahchkoor, ki pulit da pyntip ki wa da yoh wow kem ya le ngut wa kynthup ya kawi ka kynthai kawa dang 16 snem kiwa da emkti wow leh yeini i kaam ym du ha iwa da yoh wow riñ da ka CCTV ha Mawlai Nongkwar ha ka 18 tarik uni u bnai tangwa ha kiwi ki thaw leh.
Katkam ka FIR wa da e da kawi ka manbei ha ka 18 tarik da pyntip wa ka khon ko kawa dang 9 snem heipor wa liwan yung ko na skur, da chah bood ko ha kawi ka kynthai kawa da kylli ya ka lada tipmit ko ya u Adrian uwa lai Class-III heiwa da jubab ko wym tipmit ko wei heini i por da pynleh tba ko yei chkoor kani ka khynnah heiwa da looid yabor ko yei sahchkoor ksiar wei da yut ko na ini i thaw.
Ha ka 20 tarik won da yoh FIR sa na kawi ka manbei wa ha katai ka sngi heipor soo waje hadooh soo chiteiñ i janmiet da em le ngut ki bru; kawi ka kynthai wa ar ngut ki chynrang kiwa da wan psiah cha pchem yung ki wa em Mawlai Nonglum heipor wa ka khon ko kawa dang 9 snem dang kyndeh-ke ko ha lait.
Katkam wa pyntip kani ka khon ko, kawi na kini ki kynthai da ah yabor ko yei sahchkoor na liang timun wei da yut ki na kani ka thaw.
Hadien wa takit ki pulit yeini, ynne da yoh ki wow kem ya ka kynthai wa dang 16 snem 9 bnai neitæ u Mabanker Jyrwa (23 snem) uwa na Jaiaw, Lansonalane wa u Charles Myrthong (20 snem) uwa na Riatsamthiah kiwa da chah rah cha Mawlai Police Station.
Ya kini ki mar wa chah tooh da chem deiwa lai yah kawa dang 16 snem ha iwi i dukan thoo ksiar wa em ha Mawbah iwa tip kam ka New Oscar Jewellers Shop heiwa da chimkti noh ki pulit yeini.
Discussion about this post