Le tylli ki yungmane wa em ha Imphal East District ka jylla Manipur da chah tympra ki dang step ka 11 tarik uni u bnai hadien wa da pynmih hukum ka Manipur High Court wow chah ya ka sorkar wow lai ko chakhmat wow leh yeini.
Kini ki yungmane yong ka Evangelical Baptist Convention Church, Evangelical Lutheran Church Manipur waka Catholic Holy Spirit Church da chna ya ki khlem da yoh bor ha i thaw yong ka sorkar wei da em leh kiwa da chna nadooh u snem 1974 wei najrong kini ki yungmane da chah tympra leh ki karkhana wa em chajan kiwa da chna khlem da yoh bor.
Kiwa chah ktah da yaleh mutkoduma ki ha ka High Court ka Manipur kawa da pynsageh ya ka hukum ka sorkar wow tympra ya kini ki yungmane tangwa ha ka 4 tarik uni u bnai hadien wym ye kini ki balang niam u pynyoo ya ki kot ki sla wa da yoh bor na ka sorkar wow chna ya kini ki yungmane, neiliang ka High Court da e bor ko wow lai chakhmat u tympra ya kini ki yungmane.
Hadien wa da chah tympra kini ki yungmane, ki dkhot kini ki balang da wan ki wow booh yei duwai wei wow mane Blai ha ini hi i thaw.
Neiliang ka United Christian Forum of North East India da pynsñiaw ki yei khrngiat wei sñiawkhia yeini wa jia.
