Heiyatoh wa iwa jia ha iwi i krem mooyong wa em ha West Khasi Hills iwa da oor hadooh wa dooh uwi yei mynsien wei da mynsoo uwi, neiliang ki pulit da kem ki ya u tre kani ka paar mooyong uwa tip kam u Hubath R Sangma uwa na ka chnong Songsak Gurakalam, Shallang.
Ya uni da pynngat leh hapoh ki kyndon Sec 21 (1) ka aiñ MMDR Act wa Section 188/304A ka IPC.
Ki pulit ynnin i step da lai ki cha i ini i thaw wa em kani ka thaw tih mooyong wa tip kam i Urak hajan Riangdim heiwa da chem wa kani ka krem mooyong toh kawa da oor wei uwi na kiwa tih mooyong da dooh u yei mynsien katwa uwi da mynsoo heiwa uwa yap toh uwa tip kam u Lependro Sangma (34 snem) katwa uwa mynsoo toh u Hendit Momin (33 snem) kiwa na Uguri iwa dang em hapoh ka chnong Goraimari wei hapoh ka Kharkutta PS, North Garo Hills wei da lai ki chapoh ka krem mooyong hadien wa phah u tre paar.
Yei metyap da kit cha Shallang PHC yow leh ya ka Post Mortem kamjooh leh ya uwa mynsoo da kit cha kani hi ka PHC.
Na ini i thaw wa jia da chem wei da kem ya 7-8 Ton u mooyong, ki tiar ki tar tih mooyong kamjooh ka kari dieñ wa pynemkaam yow sai mooyong.
Ini i thaw wa jia toh iwa em chapoh khloo wei yow poi cheini hap wow lai kjat ar kynta hadien wa chong kari chi kynta wei jngai i kamwa 25 Km na Shallang.
