Hawa yaklam hapoh ka dorbar hajrong ka phang wa da pynlut ka sorkar da ki spah klur wow yakhun pyrchah yaka khlam COVID-19, neiliang ki MLA ka liang pyrchah kam u PT Sawkmie na Mawlai Constituency, u HM Shangpliang na Mawsynram wa u George Lyngdoh na Umroi, da sdang ki deiwa yaroh yeiwa chimkhia ka sorkar ya kani ka kaam yow pynbiang ya iwa emkaam ki paidbah nadooh ki Corona Care Centre, ki baam, ki tiar yada wa kiwi kiwi de kiwa emkaam iwa hadooh kiwi ki jylla leh ym ye ki wow pynbiang.
Tangwa heiyatoh wa pynlut ka sorkar T. 399 klur, neiliang u HM Shangpliang da kdaw u wa em hi i pynlutphut kam hawa thied ya i dawai Sodium Hypochlorite iwa da pynemkaam yow siat dawai (Disinfect) iwa da thied lyngba ka NHM iwa da poi ha ki ar bnai (April-May) T. 8,30,77,508 tangwa da ong u wa boi ha itu i por da leh neibhah wa emkaam tangwa toh u leh u bood yaki kyndon wa toh u bood heiwa da sdang wow Supply yaki mar du deiwa yaklam da i ktien donhi. Katkam wa kheiñ u Shangpliang, da ong u wa da kani ka poisa wa T. 8 klur da dep wow phah thied 8,30,775 litre u Sodium Hypochlorite wei ya ini da leh khlem da khut Tender. Deiwa kylli leh wa lada kani ka chnat ye hi ko mo wow pynsakhiat heiwon wa da dep siat kat deini sang ini i dawai wa palat 8 lak litre.
Kamtæ da ong u wa na kini ki daw poi ka pynlut wa kynjoh T. 400 klur heiwa ka NHM da pynlut ko leh ya kiwi kiwa ym em yatoh wa u COVID wei da dawa u wow leh daka ‘Special Audit’ neibynta kini kiwa da pynlut kiwa ym em yatoh wa u COVID nadooh i pynmiat yaki yung krehkaam, i thied yaki chuki hei dor wa syad bha, ki TV kiwa ym toh u pynlut heipor wa dang yaleh ka sorkar wow kdoh u khoom ya kani ka khlam, wei waroh leh yaroh ki yaka sorkar hawa leh ko ya iwa biang.
Da kdaw u leh wa ka NHM da thung bru wakreh ko timun tidiang wei lada u Montri kamjooh u Montri Rangbah tip ki ya ini wa hadooh ki bru na baar ka jylla leh da thung kreh yaki, deiwa kylli leh wa kiyi wa embor wow thung kreh hawa ya ki tre jylla leh ym ye wow e kreh yaki.
Da pynkut u deiwa ong wa ki Supplier kiwa napoh ka jylla kiwa khian wa nai hadooh katni leh ym em su yaki heiwa da dep wow pynlut da ki spah klur kammon ya kini ki Bill wa khian ym pu em dep su yaki wei lada ym em su cheiwon wiar ka poisa.
Kamtæ da kyntu u ya u Montri Rangbah wow booh daka poisa kawa du ya neibynta ka khlam neibhah wa kani ka khlam leh daw pteiñ hi ko yow lait nei pynlut phut khlem da em yukheiñ.
