Jowai: Ki wakreh ka JHADC hapoh ka lama yong ka JHADC Staff Employee Association nadooh ka 2 tarik da yakhih ki wow sangeh u wan kreh khlem booh por neidaw wym yoh ki ya ka tulop kattu la kamwa 8 bnai.
Ynne ka sngi u MDC ka liang pyrchah ha JHADC, u Andrew Shullai u MDC ka Congress da pynbaad joor u ya ka sorkar ka NPP wa yahkhmat da u Conrad Sangma kam u montri rangbah ka jylla wa ya u Thombor Shiwat kam u CEM ka JHADC hajrong yei wym ye ki wow su ya ka tulop ki wakreh ka District Council la phra bnai kattu.
Da pynrap u wa yoodur wa kani ka sorkar kwah ko wow pyndooh pyndam noh ya ki District Council hanlada da pynkupbor da ka riti synchaar ka ri wow yieñ yada ya ki khian paaid ka thaaiñ ri-loom.
U Andrew da kylli u leh cheiwon wiar ka bhah ka JHADC wa toh u yoh ko deiwa pynwiar hi-eh ya ka?
Heiyatoh wa ka yalang wa khut ya ki karkhana khyndaw-bilat ha kini ki sngi wow kyrpaad ya ki wow su ya ki dan kam chibynta i yarap ya ka Council, u Andrew da kylli u heiwon u su ki hawa ka yung krehkaam man ko kawa khang neidaw wa yakhih ki wakreh?
