Ka Meghalaya People United Front (MPUF) East Jaiñtia Hills District hapoh i yahkhmat u President, u Kyrshan Blah, ynne ka sngi ryngkat u SDO Sadar ka East Jaiñtia Hills District, u A. Verma wa kiwa kreh ka chnat Food and Supply kiwa kynthup ya ka E.V. Pariat, Sub-Inspector Supply wa u MSS Sohklet da lai pait wei takit bniah ki ya ki dukan dai mar baam wa ki dukan rachon ha ki thaaiñ Lad Rymbai heiwa ka seiñ da maham ko ya ki dukan wow booh ya ki dor ki tiar næ ka Price List ha ki dukan.
Ha ini i lai pait lai sylli da chem wa ki dukan dai baam ha ka thaaiñ em kiwa dai da ki mar ki wym thoh ya ka tarik wa kut i por, kamtæ ka seiñ wa ki bor sorkar da maham ki deiwa khor ya kini ki dukan wym toh wow booh ya kam kini ki mar ki wym em tarik wa da kut por wei lada chem ya kam kini ki dukan daw khang noh ya ki.
Chooh chooh u Kyrshan Blah da ong u wa i lai pait lai sylli u man i ymtoh du ynne ka sngi tangwa ka seiñ wa ki bor sorkar daw leh ki yeini dei langær khamtam ha ki dukan dai mar baam cha ki paidbah neibhah i dai ya ki mar baam man iwa kongsan bha heiwa emkaam u syndong kammon man ki baam.
Neiliang u sahep wa pait ya ini i kaam leh da ong u wa ym e laad wow em ki dukan kiwa dai ya ki mar baam cha ki paidbah da kiwa da kut por næ kiwa da sih wei lada chem kam kitæ ki dukan daw khang noh ya ki.
Discussion about this post