Chem ka PAC wa suki ka MeECL wow pynrkehkaam yaka Saubhagya Scheme wow pynyoh bordiñ ya waroh

Shillong: Ka Public Account Committee (PAC) yong ka yung dorbar Meghalaya Legislative Assembly (MLA) da pynsñiaw ko yei sñiawkhia wow chem yei suki ka Meghalaya Energy Corporation Ltd (MeECL) wow pynkrehkaam ya ka Saubhagya Scheme ka wow pynpoi bordiñ cha waroh ki manyung khamtam ha ka thaaiñ nongkyndong kawa da booh thong u pyndep hapoh ka 31 Wisu (March) uni u snem, tangwa kani ka chnat da paan por ko hadooh 31 u Wisu u snem wow wan.

Ka PAC da chem ko wa ini i paan por ka MeECL wow pynkrehkaam ya kani ka Scheme sorkar India wow pynpoi bordiñ cha waroh ki manyung kawa da pynbna nadooh u snem 2017 katwa haka jylla da e por wow pyndep ha u Wisu uni u snem iwa pynyoo wa ym em chimkhia ya kani ka kaam.

Hawa yaklam wa ki laad pathai khubor, u dkhot ka PAC u Zenith M Sangma da ong u wa ka chnat bordiñ ka jylla da sepai i pynkrehkaam ya kani ka Scheme kawa ym ye u pyndep heipor wa da booh da ka sorkar pyrdi deiwa paan por hadooh wa kut u Wisu ha u snem 2020.

“Ha Meghalaya da em hadooh 1.99 lak tylli ki manyung wa toh u yoh myntoi na kani ka Scheme kawa da mang poisa T.657 klur,” da pyntip u Zenith.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Da pyntip u leh wa hapoh ka jylla da phiah ya ka poisa yong kani ka Scheme ha ki ar bynta, ka wi toh neibynta ka Khasi-Jaintia Hills waka Garo Hills.

“Katkam wa pyntip da ki heh ka MeECL ha Khasi-Jaintia na ka 1564 tylli ki chnong, du 146 tylli kiwa da ye ka chnat wow pynbiang ya ka bordiñ, katwa hapoh 2-3 bnai daw pynbiang sa ya kamwa 650 tylli ki chnong. Ha Garo Hills won da em 1923 tylli ki chnong wei du 81 tylli ki chnong wa ka MeECL ye ko wow pynpoi ya ka bordiñ na kani ka Scheme, katwa sa 728 tylli ki chnong daw pyndep hapoh 2-3 bnai wow wan,” da ong u.

Sa uwi won u dkhot ka Committee, u Himalaya Muktan Shangpliang da pyntip u wa hei yong sakhiat ka poisa kawa da yabhah toh wa kynthup hadooh 2211 tylli ki chnong katwa ka MeECL da chim ko du 1564 tylli katwa ha ka bhah wa ar da em 2748 tylli ki chnong tangwa ka chnat da chim ko du 1923 tylli.

“Waroh ki chnong wa toh u yoh ya ka bordiñ lyngba kani ka Scheme toh u poi ki hadooh 4959 tylli wei ya ini ka MeECL da pynsñiaw ko wa daw pyndep lut ha kini ki kajiak snem wow wan,” da ong chooh chooh u.

Katwa neiliang u Renikton L Tongkhar da ong u wa ka MeECL da pynsñiaw ko wa i suki yong kani ka kaam toh neidaw wym ye wow pynbiang ki Company ya ki tiar.