15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Chem ka seiñ MPUF-EJHD yei boon wa pynemkaam bakla ya ki Scheme sorkar ha ka chnong Pynurkba

0 Comments
Advertisement ad1

Khliehriat: Ka seiñ MPUF-East Jañtia Hills District da pyntip ko wa hadien wa yoh ujor ko na ki kattu katni ngut kiwa chnong chnong ka Pynurkba kawa em hapoh East Jaiñtia Hills District hei yatoh wa i saam Grant Tin, i chna paikhana wa u sarok pohdong da li thooh tre ko chaphang ini.

Kamtæ neiliang ka seiñ da lai li hiar ko cha kani ka chnong ha ka 18 tarik u bnai wa da dep yow pynman ya ka takit yow chem ya i sakhiat wei hadien wa yaklam ki wa ki kattu katni ngut kiwa chong chnong ka Pynurkba da ong ki wa ki ym tip ki chaphang i saam Grant Tin, ka scheme chna paikhana kawa em hapoh ka Swachh Bharat Mission neibhah wa hadooh katni leh ym pu em wa yoh ya kani ka Scheme.

Yow chem dien chooh chooh ya ini, ka seiñ da pyrchang ko wow yachem wa u Waheh Chong uwa tip kam u R. Rymbai tangwa neidaw wa ym em u ha chnong da ya klam phone wa oo wei da kular u wow yachem waka seiñ tangwa hadooh katni leh ym em leh u ya ini.

Ka seiñ da sñiaw phylla ko leh wow yoo leh ya uwi u sarok pohdong ka tai ka chnong wa antaad wa jrong kamwa chiteiñ kilometer uwa khlaad na u sarok ka PWD wei da poi u ha yung u Waheh Chnong iwa yoo kamwa chna neibynta u Waheh Chnong donhi wei ymtoh neibynta ki paidbah.

Chooh chooh da chem wa ya uni u sarok da chna lyngba ka scheme chispah sngi (MGNREGA) wei da chna leh ya ki dooid (Side Drain). Ya uni u sarok da siang da ki mooria najrong khlem siang rong naka scheme wa wan naka Border Area Development Programme.

Ka seiñ da ong ko wa ya uni sarok da wan wai u MLA ka thaiñ u Justine Dkhar kawa du chiteiñ Kilometer tangwa ym ye u pynyoh da ka sarok psiang wei katkam pyntip wa ya uni u sarok toh da chna deiwa yarap u MLA tangwa ya ka Scheme MGNREGA won da murieh wa da chna ya uni u sarok lyngba yong ka.

Hei yatoh won waka Scheme saam Grant Tin lyngba ka SWRP Scheme kawa man leh ka MLA Scheme, katkam ka RTI wa ka seiñ wa yoh ko nadooh u snem 2013-2017 da em hadooh 23 ngut kiwa yoh myntoi heiwa da saam le Bundle cha uwi pa uwi wa yoh myntoi heiwa da mih pyrtuid u Hamlet Pdang, Thehmon Rymbai, Bliw Lamo, Phyrnai Pdiang, Pies Pdang, Philan Syih, Edling Pdiang, Kyrmen Syih, Lis Rymbai, Seiborlang Pdang, Daioshwa Pdang, Nishwa Dkhar, Storin Dkhar,Thrangmon Rymbai, Yar Syih, Beldis Pdang, Shirup Shylla, Koming Pdang, Morial Lamo, No Lamurong, Melci Dkhar, Sunshine Rymbai waka ka Pynurkba Primary Government School.

Kamtæ ka seiñ da kyrpad ko ya kiwa chong chnong ka Pynurkba lada em kwba mih pyrtuid tangwa ym em man ki kam kiwa yoh myntoi wow phone ki ha u number 8974082178 yow ye ka seiñ u yarap ya ki.

Kani toh katkam ka khubor na u President ka seiñ u Michal Chyrmang.

Share this:
Previous

Wan sakhi u Vincent Pala yei dap 25 snem ka Ieng Swer Memorial Secondary School

Next

Yarap ka NSS Unit ka KNGC wow chna thaw sum kamjooh wow yarap ya kiwa puræ ka chnong Khonglah