Ynnin ka 12 tarik da chem ya iwi i metyap uwi u chynrang na iwi i thaw wa man khloo ka chnong Nohwet wa haap hapoh ka Pynursla Police Station, East Khas Hills.
Ini i metyap toh i yong u Tapan Dey (49 snem) u khon u Gyanandra Chandra Dey na Bishnupath, Pani Tanky, Ganeshnagar, Basistha, Kamrup Metro, Assam.
Neiliang ki pulit da phah ki ya ka Mobile Forensic Team tangwa neidaw wa da miet da pyndep noh yeiwa emkaam ynne ka sngi wei da kit noh yei metyap cha Civil Hospital, Shillong wow leh ya ka Post Mortem.
Ya ini i metyap da chem da kawi ka manbei heipor wa lai thohdieñ ko na i khloo wa jngai 100 metre na u sarok psiang heiwa da chem leh ya ka kari Mahendra Pick-up wa yah u Tapan wei da chem leh ya waroh ki tiar u hapoh kani ka kari.
Ya ini i metyap da chem ha i thaw wa chariñ wei da neh i deiwa em u tylle Plastic wa kylleiñ ha u chnat dieñ wei chibhah u tylle ha u rdang u Tapan.
U Tapan da wan u wow booh Generator cha kiwa kreh Mobile Tower.
Da suba wa u Tapan da pynkut u yei mynsien u hanla kattæ leh ki pulit daw takit ki lada yap u nei chah tynyap wei daw tip hadien ka Post Mortem.
Discussion about this post