Ynne ka sngi ha ka yung Dorbar Chna Aiñ ka jylla, u MLA ka Jowai, u Wailadmiki Shylla hawa e yei klam da yaroh u ya ka mang tangka wa da wanrah da u Montri Rangbah ka jylla heiwa da ong u wa kani ka mang tangka man ko ka mang tangka ki paidbah (People’s Budget) heiwa da yoo wa ha ka mang tangka ka poisa dang ku ko na ki snem wa dadep wei da kyrmen u wa daw rap boon ki kaam pynroi hapoh ka jylla.
U Wailadmiki da ong u wa dang em chiboon ki kaam pynroi kiwa dang emkaam ha Jowai Constituency wa ka Ri-loom Jaiñtia hi waroh kawi heiwa da ong u wa ka Jowai da yaar da kmai ko katwa ki sarok won da neh ki kamjooh iwa wanrah yei khynñia kari ha ki sarok, kamtæ hajrong ini u Wailadmiki da kyrpaad u wow chna ya u sarok na Salaroh u wow man kam u Jowai Bypass.
Heijooh i por da sñiawkmen u wa ka NCTE da e bor ko wow sdang ya ka Integrated B.Ed Course ha Kiang Nangbah Government College kamtæ da kyrpaad u ya ka sorkar wow sdang noh ya ka e sikai pyn ha uni u snem.
Da ong u wa ka Jowai man ko ka chnong pyrdi ya i puræ puthi heiwa da wan puræ ki khynnah na kylleiñ ka Ri-loom Jaiñtia wa Assam, kamtæ da kyrpaad u ya ka sorkar wow pynboon ya ki rukom e sikai ha ITI wa Polytechnic khnang wow yoh kreh ki khynroo khyllood hadien deiwa wanrah ya ki e sikai kam ka Diploma da kiwa boon rukom.
Heiyatoh wa ka Jowai Civil Hospital da ong u wa kaani ka thaw sumaar chakri ko ym du ya ki bru na West Jaiñtia tangwa wot na East Jaiñtia leh kamjooh, kamtæ da kyrpaad u ya ka sorkar wow pynku kyrdan ya ka Civil Hospital kam ka State Hospital neibhah wa da em ka manyung na Ialong kawa da e thaw sñiawbha pyn harood kani ka thaw sumaar deiwa kyrpaad leh ya ka sorkar wow sdang ya ka Cancer Wing ha Civil Hospital kamwa da leh ha Tura.
Chooh choh da ong u wa ka Kiang Nangbah Government College man du ka donhi ka College sorkar ha Ri-loom Jaiñtia wei man-u-snem da sakhi yei wym yoh thaw puræ ki khynnah da ki spah ngut kamtæ da kyrpaad u wow pynboon chooh ya ki kamra namo deiwa sdang sa kawi ka Government College ha ka thaaiñ.
Heijooh i por da ong u wa hanlada sdang krehkaam ka Greater Jowai Water Supply Scheme tangwa ka sor Jowai dang heh dang kmai ko kamwa yah i por kamtæ da kyrpaad u ya ka sorkar wow chna sa kawi ka Scheme wow saam umkor na Thwai Langdung/Mynkrem khnang wow suk kiwa chong chnong ha ki snem wow wan.
Da ong u leh wa kiwa kreh ka JHADC ym em yoh tulop ki la kamwa 11 bnai kamtæ da kyrpaad u ya ka sorkar wow pynlait noh ya ka bhah ka Council khnang wow ye ko u krehkaam katkam ki bynta wa da e ya ka ha ka Riti Synchaar ka ri.
U Wailadmiki da ong u wa ka Ri-loom Jaiñtia em ko chibooon ki bru wa bood ya ka Niamtre katwa kamtæ da kyrpaad u ya ka sorkar wow pynlait poisa rap boon cha ki Seiñraij waphær waphær wow chna ya ki Khnap Thangbru khnang wow ye u pynduna ya i daiñ dieñ wei wow pynneh pynsah ya ka rymaw.
Chooh chooh hawa e yei klam ynne da ong u wa i pynemkaaam Drugs hapyrdi ki khynnah da ktah bha i ya ki manyung wa ka imlang sahlang wei hajrong ini da kyrpaad u ya ka sorkar wow sdang ya ka Rehabilitation Center wei kamjooh leh wow kyrchaan ya kam kini ki thaw wa pynlai da ki bru samen.
Heiyatoh wa ki kaam yalehke namo Sports, u Wailadmiki da ong u wa ka Ri-loom Jaiñtia da pynmih ko chiboon ki khloor yalehke wei da kyntu u ya ka sorkar wow sdang ya ka Sports Academy chirup wa i thaw sah ya ki khnang wa ki khynroo khyllood u wanrah naam ki ya ka thaaiñ wa ka jylla wei wow pynmiat ya ka Kiang Nangbah Stadium.
Heijooh i por da ong u wa ki Tech Park u mih ki ha Shillong wa ha Tura wei da kyrpaad u wow chna ya kawi ha Jowai leh kamjooh.
