Ynne ka sngi chirup wa ki paidbah, u MLA ka 2-Jowai Constituency u Wailadmiki Shylla da wan u chakhmat wow chim ya i tika COVID-19 wa nyngkong da i dawai Covishield ha Chutwakhu Urban Health Centre, kawa em ha laad Loomkyrwiang Jowai.
Ha ini i wan chim tika da emlang leh ki 4 ngut ki MDC ka JHADC kiwa da wan chim ya i tika wa nyngkong kiwa kynthup ya u Lakhon Dkhar MDC ka Sohmynting Khliehtyrchi, u Ailad Bhoi MDC ka Mukhla Wahiajer, u Brightstar Chyrmang MDC Jowai North wa u Saron Paswet MDC Jowai South.
Hawa yaklam wa u Wailadmiki Shylla da khana u i daw wa slem u wow chim tika toh wa e da laad chwa u ya kiwa da heh rta nalor wa ki dawai hapoh jylla dang rap duna ki.
Neitæ won katwa ka sorkar bei leh da pynbna ko wa nadooh ka 01-05-2021 u sdang noh u e tika wot ya kiwa 18 snem chaneiñ neitæ i daw da wan chim u ya i dawai kam wow e mynsien ya ki khon khynroo khyllood u wan ki chakhmat.
Kamwa ka khlam COVID-19 da ku ko ha ka District waka jylla, kamtæ da kyntu u ya waroh kiwa da biang rta wow chim ki ya ini i tika wow yada na uni u khñiang.
Da kyntu u leh wow wan cha ki Centre wada pynkhreh ka sorkar katwa dang em por, wa tieñsar ya boi mynstep mankawi boi mih ka hukum naka sorkar pyrdi wow ong ko wa ya kawon kawon ka kaam ye u leh du kiwa da dep e tika, wei lada jia kamtæ daw kulmar ki paidbah.
Neiliang u Brightstar Chyrmang MDC Jowai North won pynsñiaw u wa hawa sdang em u i artatien ya kani ka tika katwa boon kiwa pynsñiawthooh bakla chawah chaneiñ kamjooh ha ki Social Media, tangwa khaddooh hi neidaw wa yoo u yei smat poor kani ka kjut tæ mih u chakhmat yow chim ki laad yada dei mynsien wa sñiawskem yeiwa da pynkhreh ka sorkar neibynta i chait i khiah ki paidbah.
