Ka Chief Minister’s District Level Inter School Athletic Meet 2023 wa le sngi wa pynman da ka yung krehkaam yong u District Sport Officer, West Jaiñtia Hills District chirup i krehlang waka West Jaiñtia District Sport Association da sdang ya ka ynne ka sngi ha madan Kiang Nangbah Stadium, Jowai deiwa wan chimbynta ki 31 tylli ki skur waphær waphær wa em hapoh ka West Jaiñtia Hills.
Ya kani ka Inter School da wan wow wai da ka A.P. Syiem, District School Education Officer West Jaiñtia District hei emlang u District Sport Officer, u K. Passah wa kiwi.
Neiliang ka DSEO hawa klam, da pynsñiaw ko i kmen wa yoh u embyntalang wa ki khynnah skur waphær waphær kiwa daw mihkhmat ym du ya ka District tangwa wot ya ka jylla ha ki kaam Sport.
Da kyntu ko leh ya kiwa em sap hei lehke Sport wow lai ki chakhmat khnang yow ye ki u pynmankaam yei angnood kamjooh u man ki ka nongmuna ya kiwi hadien habood neibhah wa man ki ka mynried ka District, ka jylla wa ka ri hi waroh kawi.
Heiyatoh wa i kaam Sport ong ko ym phær la man kiwa jop næ kiwa rem tangwa iwa emkaam dooh toh i chimbynta.
Ki jait yakob ha kani ka Inter School kynthup nadooh i phet pyllah, ka Long Jump, High Jump, Shot Put, Javelin Throw, Relay Race wa kiwi deiwa bhah ha ki kyrdan waphær ya kynthai wa chynrang katkam i rta (U-12, U-16 wa U-18).
