Ka Chaad Rongkusi hapoh ka chnong Khonglah, West Jaiñtia Hills District, da pynman ya ka ynnin ka 18 tarik heiwa u montri ka sorkar jylla uwa man leh u MLA ka thaaiñ, u Lahkmen Rymbui da man u kam u kongsan.
Ha kani ka sngi da em ryngkat u BDO ka Amlarem Block, u Dr. Damut Lyngdoh kam u symbood kongsan.
Ka chaad Rongkusi toh ka lehkmen wa da chimbynta da waroh ki chynrang wa kynthai (ki khynnah, khynroo wa ki waheh) heiwa da chaad ha ki sur wa kieh na ka ksiñ wa ka bhuri.
Da ong wa ha ki por nachwa da em ka Rongniam wa da leh da ki rukom lehniam tynre heiwa du kiwa dang sati hapoh ka Raij wa ye u chimbynta.
Ki jait chaad ha ka Rongniam kynthup ki ya kini hawah:
1. Rongpyrtuh
2. Rongsynriang
3. Rongkhli
Da ong leh wa ha kini ki le rongniam em kawi ka kur ka wymye u chim bynta ha kini ki rong wei kani toh ka kur Khonglah.
Kamtæ khnang wa kani ka kur u yoh ko u chim bynta ha ki rong da pynmih noh da ka ‘Rongkusi’ iwa mut ka tamasa lehkmen wei da pynyinsur ya ki kyndon wow chimbynta ha kani ka chaad.
Ha kani ka chaad ye u chimbynta da waroh ki chynrang wa kynthai wa nadooh ki khynnah hadooh waheh.
Neidaw wa ym em kawon kawon ka lehniam da ye u chimbynta da kiwon kiwon ha kani ka chaad.
Ki khon ka Elaka kiwa kynthup ya kiwa ngait ya ka niam Chnong (Niamtre) wa ki Skur (Christian) leh ye ki u chimbynta ha kani ka Rongkusi.
Ya ka Rongkusi da jooh pynman chisien chi snem kam ka dak i lehkmen, wow yoh yei bha i miat wa i chongsuk hapoh ka chnong.
Discussion about this post