Jowai: Ynne ka sngi Mulong 29, Naisaphra 2019 chibynta i leh burom ya ka National Sports Day, u Prime Minister ka ri India u Narendra Modi hei emlang u Kiren Rijiju, Minister of State Independent Charge Youth Affairs & Sport yong ka Sorkar India, ki manheh manhain wa ki bru emsap hei liang ka Sports da pynlait paidbah u ya ka Fit India Movement ha Indira Gandhi Stadium Complex, Delhi heiwa ya kani ka prokram da sakhilang leh da ki waboon ki paidbah yong ka ri India wa ki khynnah skur ha kyllein ki thaw.
Kamtæ kam wa man ha kiwi ki thaw, ha chnong Jowai leh ya kani ka prokram da pynman ha Yungwalieh ka Loompyrdi Iongpiah hei pyntoh pyntne ka yung krehkaam yong ka District Mission Coordinator, SSA wei kamjooh ha kiwi ki thaw yong ka District leh ki skur waphær da chimbynta ki wow sakhi ya kani ka Live prokram wei wow puræ leh ya ki kyntien kular (Pledge).
Kam wa khanna parom kajiak kani toh ka prokram kawa ka sorkar India heiyahkhmat u Prime Minister u Narendra Modi dachim ko wow chongpyrkhat wei wow pynlait paidbah da kawi ka sur kawi ka thong wow pynman ya ki paidbah ka ri kiwa tip u maya yei doh i pran yong-i dahi deiwa pynwyrngia ha ki rukom yalehke wa boonjait kiwa man chibynta u saiñdur saiñdar yei chait i khiah wei khlan hei dooh i pran wa hei pyrkhat pyrdaiñ nadooh dang khian dang khynnah hadooh wa da heh da tymmen.
Kamtæ hei klam yong-o ha kani ka sngi da ong u kani toh kawi na ki thong krehkaam wei thrang i angnood yong-O wow pynman ya ka ri India kawa chait wa khiah, kamtæ dei khia pyrkhat khut u ya ki paidbah wa chongchnong ha kylleiñ ki thaw ka ri wow ya ksohktilang ki dei wow embyntalang ha ka Sports næ ki rukom lehke wa wanrah yei chait i khiah hei wa da ong chooh chooh u leh wow man ka ri kawa chait emkaam ki paidbah wa chongchnong u man ki kiwa chait wakhiah, ka yung ka sem yong-i u man ko kawa chait wa khiah kamjooh ka imlang sahlang waroh kawi leh u man ko kawa chait wa khiah.
Khaddooh chwa wow poi chawakut yong kani ka prokram neiliang u B.L. Suwer, MIS Coordinator SSA, West Jaiñtia Hills District chim u wow pachat ki kyntien sñiawngooh wei wow batai pynche leh ya ki khynnah heiyatoh wa ka thong yong kani ka Fit India Movement.
Discussion about this post