U MLA ka AITC na Mawsynram, u HM Sangpliang ynne ka sngi hapoh ka yung dorbar da wanrah u ya ka phang yaklam hajrong i sah i jhep ha Iawmusiang, Jowai khlem kit de da ka Jowai Municipal Board (JMB) deiwa ong wa ka Iawmusiang toh kawa da rim da jah kawa em hapyrdi ka chnong Jowai kawa pynemkaam da ki bru na kylleiñ wei da man ko ka sarong ya ka chnong Jowai kamwa man ka Iewduh ha Shillong tangwa ka JMB da rem ko hei kaam yong ka deiwa khlem kit yei jhep ym du na Iawmusiang kamjooh leh na yung ki bru wa sah ha ki yung wa em ha Jowai heiwa kiwa chong chnong da su ki ya ka bait kit jhep.
U Shangpliang da pynyoo lang u leh yei dur wa sah i jhep pyn hakhmat ka yung krehkaam u DC ka Jowai deiwa kylli iyi u leh ka chnat Urban Affairs ya ini i kaam heiwa ki Truck wa kit yei jhep leh ym yoh thaw lai noh ki.
Neiliang u MLA ka Congress na Mawlai, u PT Sawkmie da ong u wa ini i jooh da jia ha Marten wei ym yoh thaw thymme wow noh jhep wei lada kamni, ini i jooh i kjut daw poor i cha waroh kawi ka jylla.
Neiliang won uwa yahkhmat ka Liang Pyrchah, u Dr. Mukul Sangma da ong u wa lada dang pteiñ wow noh jhep deiwa myllien da i yong rim khlem da leh katkam ka juk wa katni, ym em wow chah u noh jhep, kamtæ ka sorkar daw hap ko wow jied kawon ka stat (Technology) wa ye u pynkrehkaam cha i yow hun ki paidbah yow lait noh nei kjut i sma lym kamtæ u MLA ka thaaiñ daw rem Election du na ini i daw wym ye u pynyoh thaw noh jhep.
Hawa pynche yeini, neiliang u Montri ka chnat Urban Affairs, u Sniawbhalang Dhar da ong u wa ka sorkar chimkhia bha ko yeini wow pynsñiawthooh paidbah ha i thaw wa da jied wow noh jhep wa em ha Moochutsdai.
Da khana u leh wa ka sorkar da pynbna paidbah ko ya kiwon kiwon kiwa kwah wow dai yei thaw yong ki yow pynman kam i thaw noh jhep wei da jied leh yei Moochutsdai kam i thaw noh jhep wa pura hadien wa da lai pait da ka District Level Task Force.
Heijooh i por da pyntip u wa katni dang pait leh ya le tylli ki thaw wa em ha Mookhep, Myntriang wa ha Shilliangmyntang kam ki thaw noh jhep wa chipor.
Hawa kylli won u Shangpliang wa lada da em kini ki le tylli ki thaw kamtæ iyi i daw wym kit yeini i jhep iwa dang neh hadooh ynne i step deiwa kylli leh wa lada em i pyrchah ki paidbah ha kini ki le tylli ki thaw, neiliang u Sniawbhalang da ong u wa daw chimkhia wow kit noh yeini i jhep.
