U Symbood Montri Rangbah ka jylla, u Prestone Tynsong da ong u ka sorkar pyrdi toh u chimkhia ko neibynta wow pynbait noh ya u pood u ang yong ki jylla wa em ha thaaiñ Northeast ka ri, neibhah wa u Montri Kaam Pohyung, u Amit Shah da klam che u ha ka Plenary Meeting ka NEC ha nongbah Shillong wa toh u pynbait noh yei kajia pood.
Da ong u wa neiliang u Amit Shah da kyntu u ya waroh ki sorkar jylla wow ya syllok neibynta wow wanrah syndon yei pynbiat ya u pood, tangwa u Prestone da ong u leh wa ya katni neidaw wa ka Assam dang pynkhreh ko ya ka Election, ym pu ye wow yaklam ya kani ka kaam, wei hadien wa da dep ka Election, ka sorkar Meghalaya daw yaklam noh ko ya kani ka kaam.
Da ong u wa toh i sien wa nyngkong wa yoh sñiaw na u Montri ka sorkar pyrdi wa em u yei thrang wow pynbait noh ya ki pood yong ki jylla ha Northeast, iwa pynyoo wa ka sorkar India daw chimkhia ko wow yaklam ya ini i eh wa ki jylla yachem ki man-ki-snem.
