U Symbood Montri Rangbah ka jylla, u Prestone Tynsong da ong u wa ki dawa wa da booh da u MLA ka North Shillong, u Adelbert Nongrum toh kiwa ka sorkar da dep ko wow chimkhia, wei i yakhih yong u MLA deiwa chong kylleiñmyngngor toh kam ka Political Drama.
Da ong u wa u Adelbert da yoo u ya ki luti wa ka sorkar ka chim ko neibynta i dawa wa da booh u, wei pynsñiaw u wa ym sñiawthooh iyi mut u MLA ka KHNAM wow lai chong kylleiñmyngngor. Da ong u wa ki phang wa u Adelbert da booh u da em ki leh hakhmat dooh ka sorkar wei da leh iwi hadien iwi hadooh katni, tangwa ym toh wow ong wa da yimphoo ynne wei mynstep u man kaam wot.
U Prestone da ong chooh chooh u wa ym boi wow yaleh Political Drama neibhah wym yoosuk, khamtam wa ki paidbah da phah ki ya oo cha Assembly wei toh u yatai ha i thaw wa da booh yow ya che neibhah ym em por wow yaleh Drama, wei hap wow yaklam ya ki phang kiwa ktah ya ka jylla wa ka pateiñ.
Hawa kylli, u Symbood Montri Rangbah da ong u wa ym sñiaw emkaam wow yachem wa u MLA ka KHNAM uwa dang pynman ya ka yakhih katni, neibhah wow yakhih hajrong ki phang wa da wanrah u ym yahaap neibhah wa ka sorkar ka yakhun dohyap ko wow pynmankaam ya kitai ki phang dawa.
Puræ leh: Chong kylleiñmyngngor u Adelbert wym pynkrehkaam yei dawa chwa i lehkmen dap 50 snem
