Chimkti noh u Awhai Andrew Shullai kam u CEM ka JHADC

Jowai: Ynne ka 27 tarik ye ko u man ka sngi wow sah khana parom ya ka JHADC wa ka ri-loom Jaiñtia waroh kawi heiwa ka Council da yoh ko ya u CEM wa 26 yong ka kamjooh leh ya u CEM uwa khian dooh i rta.

Ha ka dorbar wa kyrpang wa da pynman ynne heiwa da wan waroh ki MDC, u Chairman ka Council u AH Darnei da puræ u ya ki pyrtuid kiwa pachat (Proposed) yei pyrtuid u Awhai Andrew Shullai wow man kam u CEM ka Council.

Nyngkong dooh da pachat da u Hermon Phawa wa u Laitsing Shylla, wa ar nawon da pachat da u Moonlight Pariat wa u Winning Sungoh katwa wa le won da pachat da u Lamdibok Sumer wa u Holando Lamin.

Waroh kini ki ynru ngut ki MDC da pachat ki ya u Shullai kam u CEM wei ym em de da kiwi tawon kiwa pachat da iwi i pyrtuid wei da chim noh ya ka rai wa u Shullai u man noh u kam u CEM wa thymme ka Council.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Hadien ini da elaad ya kiwi ki MDC wow klam ki hajrong ini i jied ya u CEM wei da yoh yei klam na u MDC kam u Moonlight Pariat, u Phasmon Dkhar, wa kiwi kiwi kiwa da ekhublei ya u Shullai, deiwa yooluti wa u ye hiwot u wow yah ya ka Council ka wow ye u chakri ya ka ri-loom Jaiñtia waroh kawi.

U CEM warim ka Council u Thombor Shiwat hei klam yong oo da ong u wa ha kini ki le snem ynñiaw bnai wa man u kam u CEM ki kaam ka Council hi man ki kiwa lai bait, tangwa ki bor wa ha neiñ ym em de u yoobiang ki ya oo wow ksoh ya kani ka kaam.

Heijooh i por da ong u wa ka sorkar ym em de u pyllait ko ya ka poisa kawa toh ka bhah ka Council iwa da ktah joor ya ka khamtam hei wow su tulop wei dei mynsien wa khia da ieh noh u ya kani ka kaam ha ka 20 tarik uni u bnai. Da kyrmen u leh yeiwa bha neibynta u Shullai wow ye u wow pynlai bait ya ki kaam ka Council.

U Marki Mulieh won hei klam yong oo da kular u wow e i kyrchaan wa pura ya Shullai wow man u uwa ye u pynyatylli ya ki MDC wei wow ye u wow pyllai bait ya ki kaam ka Council.

Kam u CEM wa thymme u Shullai da ekhublei u ya ki MDC kiwa da kyrchaan wei kiwa da chaniah ya oo wei da kular u wow chakri pura ya ki paidbah khlem ñiaw chilliang khmat uwi na uwi.

Hadien ini hei yaklam wa kiwa pathai khubor u Andrew Shullai da ong u wa iwa kongsan dooh toh wow yaleh u kyntu kynrong ya ka yarong poisa ka Council kamjooh leh wow chimkhia u booddien ya i chna ya ka Iawmusiang.