Ka 21 tarik u Naikhynde toh kawi na ki sngi kyrpang ha chityllup ka pyrthai watip kam ka International Peace Day næ katæ ka sngi wa ki ri ka pyrthai yaklam ki chaphang i chongsuk chongsaaiñ yong ki bru ha satlak ka pyrthai.
Ha Jowai leh ya kani ka sngi da kynmoo warom da ka Meghalaya Bharat Scouts & Guides, West Jaiñtia Hills deiwa pynman ka yachemlang wa kyrpang yong ki dkhot ka seiñ ha District Headquarter, Jowai.
Ha ka yalang yong kani ka sngi hei pynlai ka C.D. Laloo, District Commissioner (G) MBS&G West Jaintia Hills da yoh i klam pdiang burom na u Adiam-U-Bthuh, District Secretary MBS&G, West Jaintia Hills neitae hawa kut u Carefully Gassah, District Organiser (S), MBS&G West Jaiñtia Hills da pachat u ki kyntien khublei.
Ka Saramai Tariang, Vice-President MBS&G ha ka thong yong ka International Day of Peace da pynkynmoo ko yei kaamram kam ki dkhot yong ka Scouts-Guides Movement wow man ki bru kiwa em i kithlieh wei khitkhia neibynta i chongsuk chongsaaiñ wei wow thooh ki lad ki luti kammon u yaleh wow wanrah yei miat i bha ha ka imlang sahlang khlem da em i sñiaw yaphær.
Ha kani ka sngi dawan sakhilang leh da u D.E. Pariat, Principal ka Lissi Pearl Secondary School, Mukhla kam u kongsan wei da e u leh ki kyntien e mynsien ya ki dkhot ka MBS&G hajrong ka mat kyrpang yong kani ka sngi wa ong “End Racism-Build Peace”.
