Ynne ka sngi kiwa kreh ASHA na West Jaiñtia Hills hapoh ka lama West Jaiñtia Hills ASHA Association kawa em leh hapoh ka satri ka Meghalaya ASHA Union da pynman ki ya i yakhih deiwa lai paidbah nadooh na Madan Tympang Iawmusiang chadooh cha Madan Dai-Masi, Ladthadlaboh heiwa da em ka yalang chwa wow mih ki na Iawmusiang heiwa da pynman yei ngooh Blai wei ki ASHA da rah ki leh ya ki Placard wa thoh ya ki kyntien wa har rukom wow ban joor ya ki dawa yong ki na ka sorkar khamtam wow pynku ya ka nongsngi ki kawa Rs. 2,000 chi bnai iwa man du kamwa Rs. 66 donhi chi sngi.
Kam wow kdaw heini ki ASHA da sangeh kreh ki nadooh ka 6 tarik uni u bnai hadien wa ka sorkar ymye ko wow kular hajrong i dawa yong ki.
Manda poi ha Madan Dai-Masi da em ka yalang wa tbian heiwa ka da yoh i klam na ki ASHA kam ka Bida Khonglah na thaaiñ Amlarem, ka Theodaris Dhar na Laskeiñ Block, ka Emlang Mukhim na Thadlaskeiñ Block heiwa da pynsñiaw ki yei eh i khor wa chem ki neibhah wa ki kaam yong ki toh kiwa khia katwa ka nong won kawa khian.
Ka President ka Meghalaya ASHA Union, ka M. June Myrsing hawa e ko yei klam da ong ko wa ka Montri ka chnat i chait i khiah, ka Dr. Ampareen Lyngdoh da kyrpaad ko ya ki ASHA wow pteiñ kreh noh tangwa ka Myrsing da ong ko wa ymye u pteiñ kreh kat wym pu yoh ya ka kular namo ka Assurance na ka sorkar.
Da ong ko wa ki sahep sorkar da ong ki wa da pynlait ya ki phaw klur ya ki ASHA tangwa kani ka poisa toh nadooh u snem 2013 wei ki yakhih ki katni toh neibynta u snem 2023.
Chooh chooh da ong ko wa ka sorkar kopsar kwah ko wow wanrah yei pynyaphær hapoh ka chnong wot i pynyaphær hapyrdi ki Aganwadi, da ong ko wa i kaamram man i jar jiar hapyrdi yong ki.
Heijooh i por heiyatoh wa i kam ka sorkar wa em ki ASHA kiwa yoh hadooh Rs. 7,000 – Rs. 8,000 da ong ko wa na waroh ki ynñiaw hajar tam kiwa kreh ASHA em du hapoh 10 ngut kiwa yoh ya katæ ka poisa wei i yoh leh ymtoh iwa man-u-bnai ye i leh wow man du chi bnai ha ka chi snem.
Ka Myrsing da pynbna ko leh wa i yakhih deiwa dam u lai kreh ympu kut i wei daw pteiñ i yakhih sam chaphrang.
Puræ leh: Biang thij thij i su ya ki ASHA, ha ki 18 bnai da pynlait Rs. 34.50 klur ka poisa- Pynche ka sorkar
Discussion about this post