Uwa yahkhmat ka liang pyrchah ka Meghalaya Legislative Assembly u Dr. Mukul Sangma ynne ka sngi deiwa synraan lang ki MLA ka Congress u David Nongrm wa u M. Rapsang da lai pait u ya i thaw booh mooyong (Coal Stock Area) ha Khliehrangnah, Shangpung, West Jaiñtia neidaw wa da em i ujor wa da em i leh pyrchah yaka aiñ.
U Dr. Mukul Sang da pyntip u wa da em wa wan yachem wa oo heiyatoh wa u mooyong uwa ym em wa wan kam namo uwa ym em tre uwa da booh ha ini i thaw, wei da dep phah wow lai chim yukheiñ kamjooh wow pyntip (Report) hadooh katwon em u mooyong wei haka Report da ong wa da em 1.41 lak MT u mooyong ha kani ka thaw (Khliehrangnah).
Da ong wa katkam kani ka Report wa pynmih ha u 02-06-2020 wa em 1.41 lak MT u mooyong manda poi ha ini i thaw da chem wa ym em katkam wa da chim yukheiñ, wei ye u em chiteiñ iwa mut wa chiteiñ da wiar u wei deiwa pait hi-eh ya uni u mooyong wa em heini da tip toh uni u moo toh uwa dang thymme uwa dang dep tih wot wei da chynna leh ya ki dak ki tyre kari wa yoo lakam wa dep lai kari wot neini.
Kamtæ u Dr. Mukul da ong u wa na ki daw wa em i pynbaad wa em i tih mooyong wa pyrchah yaka aiñ kamjooh i chalan mooyong wa pyrchah yaka aiñ hapoh ka jylla, deiwa kam u wa ini toh iwa da dep ya sooh-buit iwa da dep pynkhreh bha iwa da emkti kiwa boon wow leh ya kini ki kaam wa pyrchah yaka aiñ.
Da ong u leh wa daw lai u chakhmat ya ini i kaam yow pyndooh lut ya waroh ki kaam wa pyrchah aiñ wei ka Coal India Limited yow ye ko wow leh yeiwa da ekti ha ka katkam ka hukum ka Supreme Court.
Tangwa da ong won u wa ya ini i dai lilam da ka Coal India Limited toh iwa da pynslem chanam yow pteiñ i tih mooyong pyrchah yaka aiñ, yow dai lilam ya u mooyong wa ym em wa wan kamtre, deiwa pynrap u deiwa kylli neiwon wan uni u mooyong uwa ym em wa kamtre wei ini waroh ym toh iwa leh da ki bor District wei da leh deiwa phah ki bru wa khlanbor wei yeini toh u takit yow yada yaka jylla na waroh ki klam wa katni wa da poor haka thaaiñ wa ha ka ri kiwa da pynbudnaam yaka jylla.
Da pynkynmoo u wa lada ym smat u sdang noh yei tih mar pohkhyndaw wa katkam ka aiñ, ka jylla daw chem chitom bha ko neibhah kiwa boon ki dan wa yoh ko toh iwa duna bha wei da chem u ya ini heipor wa pynlai u yaka sorkar, wei ymtoh leh u mylliñ yaki District Council kiwa ym yoh yei bhah yong ki na ki marpohkhyndaw kiwa ym ye de wow su tulop hadooh katni.
Kamtæ da ong u wa kani ka sorkar i thong yong ka ymtoh neibynta ki paidbah wei du ya kini ki jait kaam wa yoo phi heini. Wei ini waroh i pynslem yaka Coal India Limited wow leh ko yei kaam yong ka da man ko i wym burom leh yaka hukum ka Supreme Court.
Chooh chooh da ong u leh wa hawa puræ u yaka hukum dai lilam wa pynmih da ki jar jiar ki District wa i dor wa da booh kam wow sdang wow tyrwa dai toh iwa duna dor bha iwa da leh khlem da lai pait chwa yei man u mooyong iwa da wanrah leh yei dooh nong yaka sorkar wei ini toh ya u mooyong wa da chah kem wei ym em wan wow kamtre. Heiwa da mih leh i suba sih nadooh kiwa khayi mooyong yei rukom pynkrehkaam yaki Auction Challan wa da em iyi re iyi chadien.
Da ong u wa yow chem yei sakhiat toh u em ka takit iwa ki paidbah leh waroh thrang ki ym du oo donhi.
