Ka chnong Huroi, East Jaiñtia Hills kawa em ha khappood wa ka ri Bangladesh dei langær maad ko yei chlai um khamtam hei ly’ur wei ha kani ka kynti leh da ban biang i chlai um ha kani ka chnong.
Hawa yaklam wa u Waheh Chnong ka Huroi, u Golden Marbaniang da pyntip u wa ynnin ka 15 trarik da jia biang i chlai um ha ka chnong heiwa da pynkynmoo u ya ka chithi wa da thoh cha u DC ha ka 7 Naitung 2023 wow kyrpaad ya oo wow chimkhia hajrong ini khnang wa ki bru wa sah ha i thaw wa clai um u lait ki nei jia wa sñiawsih.
Chooh chooh da ong u wa ymtip mynnu u ktah ki bor ka mariang ya ini i thaw heiwa ha u snem wa dadep da thoh wow chna ya i kynroh ha i thaw wa chlai um neibhah boonsien kiwa chong chnong maad ki yei eh i khor manda chlai ka um.
Kamtæ da kyrpaad u ya u DC kamjooh ya ka MLA wow chimkhia ya ini i kaam neibhah khlem em i yada daw booh hei maa ya kiwa chong chnong khamtam kiwa sah ha i thaw wa joor i chlai um.
Heijooh i por da kyrpaad u ya ka MLA wow yaklam wei wow pynsmat i kreh wow yada ya ini i thaw deiwa chna ya i kynroh kamwa da dawa ka chnong na u snem wa dadep dei yooluti wa ka sorkar lyngba ki chnat waphær waphær wow leh ki yeiwa emkaam.
Discussion about this post