Ka Voice of the People Party (VPP), Narpuh Circle da pynbna ko wa da chim ko yei rai wow e kyrchaan pura ya ka JAC yong ka Dong Namchiang hajrong wow pynman yei khang sarok kawa khlem da booh por namo ka “Indefinite Strike” kawa daw sdang nadooh i step ka 19 tarik uni u bnai.
Ka VPP Narpuh Circle da pynsñiaw ko yei sñiawkhia wa joor hajrong i sih palat pood u sarok NH-6 khamtam ha thaaiñ Narpuh hadooh wa jinjar kiwa chong chnong wa kiwi de kiwa lai luti na uni u sarok kiwa wan na kiwi won ki jylla.
Kamtæ hajrong ini i eh, neiliang ka VPP Narpuh Circle da yachem ko leh wa u MP wa thymme, u Dr. Ricky AJ Syngkon wei da paan yarap leh na kiwa yahkhmat ka Party wow yarap klam lang cha ka sorkar jylla neibynta ini i eh yong ki paidbah neibhah kawa mihkhmat yong ki, ka Santa Mary Shylla ym ye ko wow pyndep yeiwa kular yong ka hajrong uni u sarok yong ki.
Da pyntip leh wa ka VPP Narpuh Circle daw e ko yei kyrchaan wa pura ya ka JAC ha kiwon kiwon ki yakhih wa chakhmat hajrong uni u sarok. Wei ka Party da khut da wer ko leh ya waroh kiwa kyrchaan wow ya ksohkti lang ryngkat wa ka JAC khnang wa ka dong ka thaaiñ u yoh ko ya u sarok uwa bha.
Discussion about this post