Ka jylla Nagaland da chna ko da ka sorkar kawa ya tylli khlem em de ka liang pyrchah kawa da e pyrtuid Nagaland United Government (NUG) kawa da emlang ki lok ka People’s Democratic Alliance (PDA) kitæ ka Nationalist Democratic Progressive Party (NDPP) wa ka Bharatiya Janata Party (BJP) deiliang wa arngut ki MLA samen deiwa kyrchaan ka sorkar PDA wa kynthup ya ka liang pyrchah ka Naga People’s Front (NPF) wow em hapoh ka sorkar.
Kini ki seiñ saiñhima da chna ki da kani ka sorkar wa ya tylli yow poi cha i yaksuk noh ha ki kaam synchaar khadar ki Naga deiwa e daw wa i pynyoo ya i ya tylli toh iwa emkaam bha yow poi chei yasuk wei wow pynbiat noh hajrong ka “Naga Political Issue”.
Kamtæ ha ka 09-07-21, ka Core Committee ka Parliamentary Committee hajrong ka Naga Political Issue da rai ki wow yatylli hajrong ini i kaam heiwa haka 19-07-21 ka NPF Legislature Party ha ka yalang yong ka da rai wow e yei kyrchaan wa pura wei wow yarap ya ka Parliamentary Committee ka “Naga Political Issue” wei da pdiang ko yow chna ya ka sorkar wa khlem ka liang pyrchah deilang wa ka PDA.
Ka rai yonglang toh wa ini i kaam “Naga Political Issue” man i iwa da sahkut da ki phaw phaw snem weiwa emkaam wow poi noh cha iwa kut deiwa wanrah yei yasuk heiwa waroh ki MLA da rai ki wow yieñ deiwa yatylli khamtam ha kini ki por wa i yaklam yasuk da lai bah i chakhmat.
Kamtæ neini chakhmat waroh ki seiñ saiñhima toh u pynchlur ki yei yaklam yasuk “Naga Peace Talk” yow thooh ki laad ki luti wow wanrah yei yasuk noh deiwa pynchlur ya ka sorkar India wa waroh ki liang wa em hei yaklam yow pynsmat noh u pyndep yei yaklam deiwa poi cha iwa kut da iwa ye u pdiang da waroh ki liang.
