Jowai: Haka yachem ki montri ka sorkar jylla namo ka Cabinet Meeting ynne ka sngi wa pynman ha Jowai ha yung krehkaam u Divisional Officer, Soil and Water Conservation, Territorial Division, ka sorkar da chim ko yaka rai wow mynjur yei tyrwa ka chnat puræ puthi wow chna kreh ha ki 9 tylli ki Community College wa em hapoh ka jylla.
Hadien ka Cabinet Meeting, hawa yaklam wa ki laad pathai khubor, u montri ka chnat puræ puthi u Lahkmen Rymbui da pyntip u wa ka sorkar da chim ko yaka rai wa chlur bha yow pynmih kreh ha ki Community College kiwa tip katni kam ki People’s College wei kani ka kaam toh kawa da yaklam da slem wei kini ki College toh ka Nongstoin College, Ri-Bhoi College, Nongpoh; Shangpung College, Shangpung; Tirot Sing Memorial College, Mairang; Jaiñtia Eastern College, Khliehriat; Tura Christian College, Tura; Chokpot College, Chokpot; Ampati College, Ampati waka Nongtalang College.
U Lahkmen da pyntip u leh wa kini ki kreh wa dang chna toh du ya ki Arts Stream wei da pynsñiaw u yei sñiawngooh yaka sorkar yeiwa da leh ko hanlada em ko hei chitom poisa wei waroh i lut wow leh ya ini da poi ko T. 16.2 Klur chi snem.
Chooh chooh da ong u wa kani ka T. 16.2 Klur man ko hajrong ka poisa kawa da yarap chwa ka sorkar cha ki kattu katni ki College wei i rukom su tulop u man ko katkam ka State Scale wei kitu kiwa yoh won yaka UGC Scale u pteiñ ki u yoh yaka tangwa manda chong ngiah daw psiah noh ki cha ka State Scheme.
Ha Nongstoin College da chna kreh 43 tylli (Teaching wa Non-Teaching Staff), Ri-Bhoi College 31 (Teaching wa Non-Teaching Staff), Shangpung College 26 (Teaching wa Non-Teaching Staff), Tirot Sing Memorial College 26 (Teaching wa Non-Teaching Staff), Jaiñtia Eastern College 31 (Teaching wa Non-Teaching Staff), Tura Christian College 32 (Teaching wa Non-Teaching Staff), Chokpot College 28 (Teaching wa Non-Teaching Staff), Ampati College 33 (Teaching wa Non-Teaching Staff), waka Nongtalang College 40 tylli (Teaching wa Non-Teaching Staff).
Yei daw wa phær i rukom bhah kreh, u Lahkmen da ong u wa em ki College em ki rap boon ki laiñ puræ (Stream) kamtæ emkaam ki rap boon ki wakreh wei i pynbna wow khutkreh daw pyntip hadien wa dep chong yaklam wa kini ki College.
Neiliang u symbood montri rangbah u Prestone Tyngsong da ong u wa ka sorkar da leh ko ya ini hanlada duna poisa ko deiwa pyrkhat ya kitu kiwa em cha palatsor kiwa chem chitom wow yoh thaw lai puræ hadooh wa hap ki wow dooh u lai puræ.
Discussion about this post