Chon ha ka chap ka Wait ha ka EVM mih won da u Syntu Lotus ha ka VVPAT ha Kyngdongtuber

Jowai: Ynne ka sngi da sangeh syndet i thap Vote ha Kyndongtuber Polling Station kawa haap hapoh ka 3 Raliang Constituency heiwa heipor wa ksih ha i dur ka Wait wa em ha ka EVM kawa man leh ka chaap u kyrtong samen u Richard S Lyngdoh da mih won da i dur u Syntu Lotus na ka VVPAT iwa da pynkhyrngiat ya waroh kiwa em ha kani ka Polling Station (PS).

Katkam ka khubor wa da yoh da ong wa ka VVPAT wa pynemkaam ha kani ka thaw da thut ko heipor kamwa 12:30 i sngi wei da kylliang ya ka heipor kamwa 2:15 i sngi.

Tangwa ki paidbah ha kani ka PS ym chaniah de ki ya ka EVM wei da pyrchah ki hadooh wa da haap pynsageh ya i thap Vote ha kani ka PS.

Heiyatoh wa ini neiliang u District Election Officer uwa man leh u DC ka WJH da ong u wa ynne i sngi nyngkong u Returning Officer (RO) da phah u ya u Engineer wa ka kor VVPAT (Spare) cha kawi ka PS wa em ha Mowkaiaw Constituency heiwa ka VVPAT da thut ko wei da pynchna ya kani ka VVPAT kawa em ha kani ka Constituency wei ym em de pynemkaam ya ka VVPAT (Spare).

Related posts

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Manda liwan ki (Engineer) heipor kamwa 12:30 u RO da yoh phone u na u Presiding Officer wa em i thut ka VVPAT wa em ha Kyndongtuber PS wei hadien ini da phah u ya u Engineer wow lai cha Kyndongtuber.

Neiliang u Engineer won manda chem u wa sih ka kor VVPAT wa em ha Kyndongtuber PS da pyndait u ya ka VVPAT (Spare) kawa da rah chwa u kawa da mang neibynta ka Mowkaiaw ha ka Kyndongtuber kawa haap hapoh ka Raliang Constituency.

Ha ka VVPAT da pynchong sarin ya ki pyrtuid ki kyrtong ki party wa ka chaap jar jiar katkam ka Constituency katkam wa man hi ha EVM.

U DEO da ong u wa ini da jia neidaw wa u bood u Presiding Officer wa u Engineer ym em bood ki ya ka kyndon krehkaam namo ka Protocol heiwa da mih ini i bakla neibhah ki kor VVPAT da pynkhreh ya jar jiar ki chap katkam ki kyrtong wa em hapoh ka Constituency.

Neiliang u kyrtong samen kani ka Raliang Constituency u Richard S Lyngdoh ynne i janmiet da ujor u leh ha u DEO heiyatoh wa ini iwa jia.

Da pyntip u DEO leh wa daw pynman ya i thap Vote thymme namo ka Re-poll ha kani ka PS ha ka sngi wa daw booh da ka Election Commission of India.