theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1

Chong kyllaiñmyngngor kiwa kamai Tourist wa chah tynyap dusmon u dkhot

Kiwa yah kari kamai hapoh ka lama yong ka Jowai-Shillong-Guwahati Tourist Cab Association, ynne ka sngi da pynman ki yei yakhih wa jai-jai deiwa chong kyllaiñmyngngor ha Jowai deilang wa ki Placard kam ka dak u pynyoo i pyrchah joor hajrong i chah tynyap dusmon u dkhot ka seiñ u (L) Fullmoon Kharsahnoh uwa naka chnong Larnai, West Jaiñtia Hills hei miet 16 tarik uni u bnai katwa dang lai kamai Shillong-Jowai, wei yei metyap yong oo da chem ha Mynkre East Jaiñtia Hills katwa ka kari yong oo won ym pu em chem ya ka.

Ha kani ka chong kyllaiñmyngngor da emlang kiwa hayung ha sem u (L) Fullmoon Kharsahnoh, u Waheh Chnong ka Larnai, u Koyas Kharbithai, neitæ da wan pynchngaaiñ lang leh kiwi won ki seiñ kamai kari kiwa na Khasi wa Jaiñtia, ki seiñbhalang wa kiwi kiwi.

Neiliang ka payu u (L) Fullmoon ka Iateiskhem Kharsahnoh khana ko wa haka 16 tarik chwa wow lai Book leh da Phone u tangwa heipor 12:00 waje i sngi won wym em de yoh Phone ki oo, katwa dang toh heipor sngi ym em pyrkhat sih ki iyi iyi tangwa hadooh i miet sdang ki wow kulmar wei lai pyntip cha ki bor pulit.

Kam ka yung hei lai luti yong ki wow thooh yei hok, ym em beiñ ki yaka aiñ neibhah katkam i lai luti  chem ki wa lai ko chakhmat yei kaam, tangwa yooluti wei angnood ki wa ka aiñ u kreh chitom ko hadooh wow chem ya kiwa emkti khnang wa kam ini wym jia de i ya ki bru wa lui lui.

Neiliang u Waheh Chnong ka Larnai leh khana u wa nadooh i por wa yoh yutip ka chnong da emlang u wa kiwa hayung u (L) Fullmoon nadooh wow li booh ujor, i lithooh ya iwa dang sah yong oo, kamtæ oo leh kyrpaad u yaka aiñ wow chimkhia ko khnang yow chngaaiñ kiwi won kiwa yah kari kamai kamjooh ki paidbah wa lai wa wan.

“I yakhih yong i ynne ka sngi toh yow pynyoo cha ka sorkar wa i kam ka seiñ em i yei bahkhlieh i sñiawkhia, wa ymtoh u e laad kam ini wow jia neipor chei por,” ong u John Lyngdoh, Secretary Jowai- Shillong-Guwahati Tourist Cab Association.

Ong haroh u wa i sangeh kamai ka seiñ ynne ka sngi deiwa pynman ya kani ka chong kyllaiñmyngngor wymtoh wa pyrchah sorkar tangwa u pynyoo yei yatylli  weiwa ka sorkar u chimkhia ko, wa tieñ ki ya boi wiar kiwa yah kari uwi hadien uwi.

Ya kani ka chong kyllaiñmyngngor nyngkong da chong ki ha Stand Shillong wei hadien won ki bor District da phah kyrriah noh ki cha Laad Kiang Nangbah Government College.

Share this:
Previous

Da pynkrehkaam ya ka Section 144 ha East Jaiñtia Hills waroh kawi

Next

Ya ka NPP da sdang ha Jowai wei em kabu ksiar wow jop waroh 5 tylli ha West Jaiñtia: Wailad