August 24, 2022
Ha i lehkmen ka National People’s Party yei dap 10 snem iwa da pynman leh ha Jowai, u District President uwa man leh u MLA ka 2-Jowai Constituency, u Wailadmiki Shylla ong u wa ya ka Party NPP da sdang yaka ha Jowai haki 10 snem nachwa, wei hei lai luti wa 10 snem katni da em ko hadooh 21 ngut ki MLA hapoh ka jylla najrong boon ngut ki MDC, em ko 7 ngut ki MLA ha Manipur, uwi ha Arunachal, em haroh ko u MP cha ka Raja Sabha wa kawi ha ka Lok Sabha.
Ya kani ka lehkmen da pynman ynne ka sngi ha Jowai deiwa emlang ki MDC ka NPP wa kynthup ya u Thombor Shiwat, CEM JHADC, u Lakhon Dkhar, u Aiborlang Shadap, u Het Pohthmi, u Saron Pasweth, kiwa kreh ka Party wa kynthup ya u NPP District Secretary, u Donboklang Kharjana wa kiwi.
Hawa yaroh ya u National President, u Conrad Sangma uwa man leh u Montri Rangbah ka sorkar jylla, u Wailadmiki Shylla ong u wa hapoh i yahkhmat yong u Conrad i yakñieh chuki wa jooh jia khah khah nachwa hapoh ki District Council waka sorkar jylla katni ym em de.
Wei najrong wym em de kawon kawon ka thut hei saiñhima sima, hapoh i synchaar ka NPP da ye leh u wanrah yei roi i paar ha kiwa boon ki liang.
“Hao wym ye u len wa em leh boon i pynbaad, khamtam hawa em iwon iwon i bakla da chah pynbaad bait wa leh ka NPP, tangwa lada em i bha waka NPP leh won ko wym jooh em wa yaroh,” ong u Wailad.
Kam u District President ong u wa hei lai luti chawah chañeiñ ka sur u paidbah pyntikna ko wa kani ka kynti toh ka kabu wa biang tam yaka NPP wow jop ha waroh 5 tylli ki Constituency hapoh West Jaiñtia.
Heijooh i por da yoo leh yei kyrchaan ki paidbah kat chawa lai, khamtam hawa lai pynskem ya kiwa kitkaam ka Party ha ki Constituency waphær waphær.
Neitæ heiyatoh waka Jowai Constituency kawa da mihkhmat u kam u MLA nadooh u 2018, ong u hadien wa chimkti u yei kaam da pyrchang u ki laad ki luti wei kam ka District warim tam yoo u boon i emkaam wei wa boon ki kreh warim wa sahteiñ da ki phaw phaw snem.
Iwi wa sñiawkmen u toh wa da ye u wow pyndep yaka Umngot Water Supply Scheme kawa da sahteiñ da boon snem khlem em de wa pait yaka, katwa yaka Iawmusiang leh ma dei wym pynwit pynthut u Contractor da toh u lai bait ko chakhmat.
Chooh chooh ong u lada pait yaki Scheme wa ka sor Jowai jooh yoh ko toh du T. 20-30 lak chi snem, hadien wada yaklam won u hapoh Assembly katni da ku cha ka T. 1 klur tam. Tangwa kattæ leh ong u wym pu em biang wei daw yaklam chooh u wa ka sorkar.
