15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Chongchit i sdang yalap Election ka Congress ha Mawryngkneng

Advertisement ad1

Ka seiñ Congress ynne ka sngi da sdang ko ya ka yalap Election chiteiñ samoi ha Mawryngkneng da kawa chongchit, heiwa da ki spah ngut kiwa yalam na ki 6 tylli ki Zone da wan ki cha katai ka yalang neibynta wow kreh yow pynjop ya u Highlander Kharmalki ha ka Election.

Ha kani ka sngi da emlang leh da ki MLA ka Congress wa kynthup ya ka Dr. M. Ampareen Lyngdoh, u George B Lyngdoh wa u Himalaya M Sangpliang wei kamjooh ki MDC ka Party najrong kiwa yahkhmat ka Mawryngkneng Block Congress Committee.

Ha kani ka sngi da pynbna wei da phiah ya ki 6 tylli ki Zone yong ka Congress ha katai ka Constituency ki wow krehkaam neibynta wow pynjop ya u kyrtong ka Party, wei ha kitai ki Zone da thung leh ya ki MLA wa MDC wow ya krehlang wa ki wakreh ka Party.

Hawa klam ha kani ka sngi, ka MLA na East Shillong, ka Dr. M Ampareen Lyngdoh da ong ko wa kani ka Election toh kawa emkaam wow ya tylli wei kamwa man katni neibynta ka jaitbru ym em seiñ UDP, PDF næ Congress tangwa du ka yurim. Da ong ko wa ym toh wow chah u knieh ya ka chuki yong u MLA wa da khlaad noh u David A Nongrum na katai ka Constituency.

Da ong ko wa u kyrtong wa katni na Mawryngkneng toh u uwi u moolangnai uwa nang wa stat, deiwa pynrap wa lada ka Congress dooh ko ya ka Mawryngkneng, ki paidbah daw hap ki wow bahkhlieh hi ya ki longdien neibhah phi tip bha phi kammon i man katni.  

Da beiñ ko leh yei booh mooyurim ini wa dep ka sorkar ya ka CHC ha Mawryngkneng, deiwa ong wa katai ka CHC toh kawa da ksaaid da u David Nongrum, tangwa ka sorkar dang nood ko wow wan wai biang ya u mooyurim.

Da beiñ ko leh yei pynlut poisa ka sorkar heiyatoh waka khlam COVID-19, i chalan tooh ya u mooyong, i chah pyndooh bordiñ, i wym biang ka um-baam, um-dih wa kiwi kiwi de.

Ka Dr. Ampareen da kyntu ko ya ki paidbah ka Mawryngkneng Constituency wow e yei jop ya u Highlander.

Ha kani ka yalang da yoh leh i klam na ki ar ngut ki MLA ka Party wa na u kyrtong ka Party u Highlander Kharmalki, uwa da ong wa em chiboon tylli ki phang wow yaklam tangwa i por ym biang wei daw klam u yaki phang kiwa ym pu mih haddooh katni manda ki paidbah jied ki ya oo kam uwa mihkhmat.

Share this:
Previous

Jop ka Khimusniang ynne haka Open to All T20 Cricket Tournament 2021 yong ka AJCA

Next

2 ngut kiwa dang yoh COVID-19 ha Meghalaya wa kynthup ya uwa wan uiñke suwari