15 49.0138 8.38624 1 0 4000 1 https://wyrta.com 300 0
Advertisement ad1
Advertisement ad1

Chongchit ka jied WC ha Shangpung Pohchnong

0 Comments
Advertisement ad1

Jowai: Katwa dang lai ki por ki sngi ka kaam jied Waheh Chong da man ko kawi na ki kaam wa chongchit dooh ki paidbah wow leh, kamtæ ynne ka sngi kamwa man cha kiwi ki chnong waphær waphær neiliang yong ka Dorbar Chnong Shangpung Pohchnong da pynman ko ya kani ka yajied ya u Waheh ka Chnong.

Ynne ka sngi ya i jied Waheh Chnong wa thymme neibynta ka samoi krehkaam kawa 3 snem (2017-2020). Ha kani ka jied Waheh Chnong da em 3 (le) ngut ki kyrtong kiwa yakhun ya kani ka kaam wa khia wow pait ya ka chnong ka thaw.

Kini ki le ngut kynthup ki ya u Rikmen Sutnga, u Trelang Suchiang wa u Bantreilang Dhar, heiwa dang step ki paidbah da pyndep ki ya ka hok thap Vote yong ki da ka Secret Ballot, ya kani ka kaam jied Waheh Chnong da wan pyllai da u Acting Dolloi ka Elaka u Chanki Langbang ryngkat kiwa bood yong oo heiwa da wan hadooh 926 ngut ki wow thap Vote.

Hadien wada bichaar wei wow niaw ya ki Vote da rai jop ya ka kaam Waheh Chnong cha u Trelang Suchiang uwa yoh 359 Vote, uwa bood ya oo hei yoh Vote toh u Rikmen Sutnga uwa yoh 357 Vote katwa Bantreilang Dhar da yoh u heiwa le da ki 205 Vote katwa 5 tylli ki vote da man ki kiwa yap (Invalid).

Neiliang yong u Acting Dolloi da yaroh u ya ki paidbah yong ka chnong wada em ki i mynsien kitkhia wa i bahkhlieh neibynta i bha i miat ki paaid wa chong chnong katkam ka riti synchaar paidbah, da e u leh ki kyntien sneiñ kyntu wow man ki kiwa yakrehlang ha ki kaam ka chnong.

U Trelang Suchiang hei klam yong oo da ong u kam wada jied wei wada chaniah ki paidbah wow jied ya oo wow man kam u Waheh Chnong da khut lang u ya waroh wow yakrehlang ki chirup khnang wa i thmu wa bha ya ka chnong u man ki kiwa jop.

 

Advertisement ad1

0 Comments

Leave a Reply