Ka Government Girls’ Higher Secondary School Jowai ha ka 15 tarik da pynhaap pyrda ko yei lehkmen dap 50 snem i lai luti ko wow chakri hei tip i stat haka imlang sahlang, wei ya kani ka lehkmen da wan wow pynhaap pyrda da ki ar ngut ki Montri sorkar wa kynthup ya u Lahkmen Rymbui, u Montri ka chnat puræ puthi wa u Wailadmiki Shylla, Montri i chait i khiah kamjooh ka chnat Sports & Youth Affairs.
Da emlang leh ha kani ka sngi u Director of School Education and Literacy Meghalaya, u Banteilang J Kharshandi, ka Dr. W. Sumer, Principal Co-ordinator Golden Jubilee Celebration Core Committee kawa man leh ka DSEO Jowai, West Jaiñtia Hills, najrong kiwa sikai, ki khynnah skur wa kiwi.
U Wailadmiki Shylla hawa klam ong u ha kam kani ka sngi lehkmen toh u e khublei yei tip i stat wa da yoh wei wow e khublei haroh ya waroh kiwa embynta u yarap ya kani ka chlem e sikai.
Da klam e mynsiem haroh u ya ki khynnah kani ka skur deiwa ong, hanla i lehkmen i ha kani ka skur kawa man ka thaw puræ kyrpang du neibynta ki kynthai, em won ki thaw ha ka ri India ki wym em u kmen hawa kha ya ki khon kynthai.
Tangwa hawa kyruiñ cha ka jylla Meghalaya yong i won yaphær ko na kiwi ki thaw yong ka ri neibhah wa i won sñiaw yoh kyrkhu bha i hawa yoh ya i khon kynthai.
Na itæ i daw kyntu u wow chim kabu ya kani ka laad najrong wa haka juk katni ym em de iwon iwon wa ki kynthai ym ye ki, deiwa e nongmuna u ya ka kynthai kawa ksoh yei kyrdan wa hakhlieh dooh ka ri India katni ka Droupadi Murmu.
Kamtæ yooluti haroh u wa kini ki khynnah skur ka Govt. Girls’ Higher Secondary School Jowai u mih ki chakhmat ha ki bynta waphær waphær ka imlang sahlang wei wow man nongmuna ki ya kiwi, khamtam kitu ki khynnah kynthai wa em i angnood hei puræ puthi.
Wei ong u leh kam kiwa yahkhmat katwon dap ki dei kmen hawa yoo yei ku ki thaw puræ sorkar wei lehbha ki hei puræ puthi.
U Lahkmen Rymbui won hawa klam ong u, ynne toh ka sngi sahkynmoo ya ka sorkar jylla neibhah wa kawi naka chlem e sikai hei puræ puthi yow pynmyntoi ya ki khynnah kynthai dapoi ko cha u moomær lehkmen dap 50 snem.
Wei kamwa ka Moto yong ka skur ong ko “Think Act Flourish,” kyntu u ya ki khynnah skur u pynemkaam ki yeini i kyntien yow ye ki u chim ka rai wa biang wei wow jop. Wei yow ye u leh yeitæ ong u emkaam ya ki bei ki pa ha yung, kiwa sikai ha skur u bood ki yeini khnang yow ye u tyrchaaiñ, tangwa iwa emkaam dooh toh u em ha ki hi i raikut kammon u jop.
Discussion about this post