Ka yalang yalap Election ha chnong Mooshrot neibynta u kyrtong MDC ka NPP 13-Saphai Constituency, u Remdor Kupar Lyngdoh da man ko kawa chongchit heiwa ya ka yalang da pynlai da u Niawkor Suchiang heiwa da yoh yei klam na ki kattu katni ki waheh kam na u Roming Lamare, Secretary chnong ka Mooshrot wa na u ma Nehemayah Tyngkan.
Da kyntu leh ya kiwa chong chnong ka Mooshrot wow man ki kiwa siañ u jied ya uwa mihkhmat uwa yieñ na ka NPP kawa man kam kawa yahkhmat ya ka sorkar MDA-II iwa mut lada u Remdor Kupar Lyngdoh jop u, daw suk u yoh myntoi ka chnong Mooshrot.
Ha kani ka yalang da emlang leh u Deputy Chief Minister u Sniawbhalang Dhar uwa da yaroh ya ka chnong Mooshrot wa stat ko wow jied da u kyrtong wa dang khynroo uwa dang khlan u phet u phar neibynta i myntoi haka imlang sahlang.
Chooh chooh u Sniawbhalang Dhar da ong u wa oo kam u MLA heijooh i por u Deputy Chief Minister u emlang u chirup chirup wei u krehlang u wa u Remdor Kupar Lyngdoh.
Hawa pynkut yei klam, u Sniawbhalang da ong u wa dap u dei mynsien dei kmen wow yoo yei chongchit ka yalang neibynta u Remdor Kupar Lyngdoh kat cha wa lai ki chnong wa haap hapoh ka 13-Saphai Constituency wei i jop yong u Remdor Kupar Lyngdoh da man iwa tikna.
Discussion about this post