Ka sngi wa ar ka dorbar Autumn Session ka Meghalaya Legislative Assembly da sdang ko deiwa chit bha hadien wa wanrah u MLA ka Mawphlang u SK Sunn yaki phang kylli heiyatoh wa u mooyong.
U Montri Rangbah ka jylla u Conrad K Sangma uwa pait leh yaka chnat Mining hawa e yei jubab da pyntip u wa kitu ki bru kiwa da yaleh wow yoh yaka Mining Lease, Mining wa Prospecting License hadien wa pynbiang yaki kot ki sla, neiliang ka sorkar jylla daw phah ko ya kini cha ka Ministry of Coal kawa daw e yaka Prospecting License heiwa ki bru wa thmu wow tih mooyong daw hap ki wow phah haki Company wow leh yaka thooh bniah yei em ki mar pohkhyndaw wei wow pynkhreh yaka Mining Plan, hadien ini, ka sorkar jylla daw phah won ko ya ini waroh cha ka Ministry of Coal yow yoh yei mynjur, hadien ini daw emkaam wow yoh leh saka Environmental Clearance wa kiwi kiwa emkaam wow yoh bor naka State Pollution Control Board. Hadien ini daw emkaam leh wow yoh yei mynjur naka Coal Controller Organisation kawa em ha Kolkata, wei hadien ini u Director General for Mine Safety daw e bor u wow wai noh yei tih ya u mar pohkhyndaw. Kamtæ hadooh kattæ ym pu em u e yaka Mining Lease.
Hawa kylli won u Sunn ya u mooyong uwa da dep chim yukheiñ, u Conrad da pyntip u wa ha u snem 2015 da em kamwa 1.34 klur MT u mooyong uwa da kam toh uwa da dep tih uwa sah, tangwa hadien ini manda lai chim yukheiñ ka Committee wa thung da ka NGT da chem ki 95 lak MT. Hadien ini, ki tre mooyong hadooh ka Supreme Court leh da phah chim yukheiñ biang ko wei da chem wa em 32 lak MT heiwa yeini i chem leh da pdiang daka Supreme Court wei na ini i daw wa katni daw dai lilam noh ya uni u mooyong wa 32 lak MT.
U Sunn da pteiñ u deiwa kylli won wa lada ka sorkar chem ko næ ym em yei chalan tooh ya u mooyong.
Hajrong ini, u Conrad da pyntip u wa i kaam tih mooyong pyrchah yaka aiñ kamjooh i chalan tooh ya u mooyong toh iwa da maad da slem, deiwa pyntip wa ha u snem 2014 da em 203 tylli ki Case, ha u 2015 da em 541 tylli, ha u 2016 da em 117 tylli, ha u 2017 da em 274 tylli wei nadooh u 2018 da em 400 tylli ki Case wa yatoh wa i tih mooyong pyrcah yaka aiñ kamjooh i chalan tooh. Wei na ini da yoo wa da kynjooh 2000 tylli ki Case, kamtæ ka sorkar da pynkrehkaam ko daka aiñ MMDR Act yow kdooh u khoom ya kani ka kaam.
Da ong u wa nachwa da pynkrehkaam du daka CrPC kawa ym ye wow pynchitom ya kiwa leh pyrchah deiwa khor tangwa hapoh ka Section 21(4) ka aiñ MMDR, kiwa leh pyrchah ye ki wow chah kem hadooh 5 snem wei ka kuna leh man ko hadooh T. 5 lak. Da pyntip u leh wa da pynjoor yei uiñ sonteri da ki pulit waka DMR, da booh leh yaka Helpline Number yaki bru kiwa ye wow pyntip cha ka sorkar lada tip ki ya iwon iwon chaphang kini ki kaam wa man pyrchah yaka aiñ wei da e buskit T. 5000 hawa pyntip. Chooh chooh da pyntip u wa hapoh kani ka kyndon kani ka aiñ, lada em kiwa da dep wow dai ya u mooyong pyrchah yaka aiñ, ka sorkar leh ye ko wow lai chim ya ka poisa wa da yoh ki.
Heiyatoh won waka chalan, u Montri Rangbah da pyntip u wa da chon yaka haka kot wa eh u yoh lane u chna tooh, i sia leh iwa pynemkaam toh iwa ym ye de wow pynkylla yeiwa da dep wow chon, da em leh ka Hologram wa u QR Code haka chalan yow lait nei chna tooh yala chalan. Katwa ha ki Check Gate won daw booh da ki Smart Integrated Check Gate ha kiwa boon ki thaw. Da booh leh yaka High Level Committee kawa yachem chisien chi bnai heiwa ki dkhot ko toh u Additional Chief Secretary, u DGP wa u Commissioner Secretary ka Mining kiwa booddien ya kini ka kaam.
Hapyrdi wa dang jubab u Montri Rangbah da pynwit u Zenith Sangma u MLA ka Congress na Rangsakona Constituency deiwa ong wa u Montri Rangbah da pynjrong ware u yei jubab dei wym jubab thij yeiwa kylli, kamtæ u Zenith da kylli u wa lada dang em næ ym em de u mooyong wa 32 lak MT uwa toh u lilam noh wei manda pyrchang u Conrad wow jubab ya ini deiwa ong wa hap hi wow e ya i jubab wa jrong wa bniah yow sñiawthooh lang chaphang kani ka kaam, u Zenith da pynwit biang u heiwa u Conrad da ong u wa lada u MLA kylli u katni lane ym ngait u yeiwa em uni u mooyong wa 32 lak MT uwa em nadooh i por ka sorkar warim heiwa oo leh jooh man u kam u Montri sorkar, toh u kylli u ya ini i jooh nadooh itu i por, deiwa ban biang u wa em ka parom wa mih uni u mooyong katwa u Zenith won da ong u wa ym kwah u wow ap yei parom wei kwah u tip donhi lada uni u mooyong wa da dep wow e yukheiñ leh cha ka Supreme Court wa dang em u næ ym em de u, heiwa u Conrad da jubab biang u wa ya uni u 32 lak MT toh uwa da chim yukheiñ nadooh ka sorkar warim wei neiyi i daw da pynbaad won yaka sorkar wa katni wei lada ym ngait u ya ini, mut wa da artatieñ u leh yaka hukum ka Supreme Court. Neiliang u Zenith da kylli biang u deiwa ong wa lada u mooyong wa kani ka sorkar da chim yukheiñ wei da e cha ka Supreme Court wa lada uni u mooyong dang em u næ ym em deiwa dawa na u Conrad wow e yei jubab wa chi kyntien wa lada em næ ym em de uni u mooyong, u Conrad da jubab u deiwa ong ym ye wow e kam itæ i jubab lada ym yohlaad u wow khana deiwa bniah deiwa kylli kylliang leh ya u Zenith wa ha i por wa pynbna nyngkong ya uni u mooyong wym em boh u, heiwa u Zenith da kylli biang u lada uni u mooyong dang em u næ ym em wei lada u Montri Rangbah skid hi-eh kwah u wow kylli da iwi tawan heiwa u Conrad da e u yei juba wa ha-o em hi uni u mooyong wei lada ym em u kammon u pdiang ka Supreme Court ya ini hadooh wa da chah wow kit noh ya oo wei lada ym ngait u ya ini, ini mut wa da artatien u pyn ya oo hi, ka sorkar warim kamjooh yaki sahep sorkar hadooh yaka Supreme Court.
Neiliang u Saleng A Sangma u MLA ka NCP na Gambegre Constituency hawa chimbynta ha kani ka yatai da ong u wa yosar ha i por wa chong ha ka chuki kam u montri te toh jadu ki wei mylliñ ki yei kaam wa toh u leh ki tangwa manda dooh yaka chuki da yoo che kdar ya ki kaam wa pyrchah yaka aiñ, heiwa da ong u wa boi daw hap u wow sdang u kdong noh yaki truck wa kit mooyong pyrchah yaka aiñ lada ka sorkar e buskit ko T. 5000 ya kawi ka truck heiwa u Conrad da pynche u wa ka buskit toh ya kiwa e yutip ym toh deiwa kheiñ katwon tylli ki truck wei u e T. 5000 kut wa yoh yutip chaphang kini ki kaam wa pyrchah aiñ.
Kiwi de kiwa chimbynta ha kani ka yatai toh u Charles Pyngrope, Dr. Ampareen Lyngdoh, u George Lyngdoh wa kiwi kiwi.
