theme-sticky-logo-alt
theme-logo-alt
Advertisement ad1

Chongkun ka Dorbar ka Seiñ Kur Phawa Siangshai ha Wahiajer

Jowai: Ka Seiñ Kur Phawa Siangshai kawa kdup ya ki kur sin kiwa tip kam ki yong Muruh, ki Sna, ki Longdoh Phawa, ki Kanai, wa kiwi kiwi kiwa dang yatoh chi kur wa ki yong Phawa Siangshai, kiwa man leh ki khon yong ka Kaiksoo, da wan chongchit ki ynnin ka sngi cha ka Dorbar Kur kawa 3 kawa da pynman ha Madan Maya Club, Wahiajer, West Jaiñtia Hills District.

U Rev NS Phawa da man u kam u kongsan ha kani ka dorbar kur yong ka Sein Kur ki Khon ka Kaiksoo, Phawa Siangshai.

Ha kani ka sngi ka Seiñ Kur da pynkup burom ko leh ya ar ki waheh kur – kiwa kynthup ya u K. Dikyl Phawa, uwa da man u kam u Chief Engineer ka tnat Water Resources Department, ka Sorkar jylla u wa nyngkong dooh wow ksoh ya katai ka kyrdan na pyrdi ki dkhot ka Kur. Heijooh i por da pynkup burom leh ya u Simon Siangshai u wa da jooh man kam u MLA uwa nyngkong na pyrdi ki dkhot ka kur wei wada jooh man u leh kam u montri ka Sorkar Meghalaya. U Simon Siangshai da man u kam u MLA ka Rymbai (Katni Khliehriat) Constituency nadooh u snem 1988 hadooh u snem 2003.

Kam wow pynchlur, wow e mynsien ya ki khon ka kur kiwa em hei puræ puthi, da pynkup burom leh ya ki 6 ngut ki khynnah skur kiwa da paw bha ha ki SSLC wa ka HSSLC Eksamin.

Kitai ki 6 ngut kiwa da yoh yei pynkup burom toh u Haoo Marleke Siangshai (SSLC) Chennai-86.6%, ka Haka Bilious Siangshai HIgher Secondary Course Certificate, Chennai-92%, U Erickson Lyngdoh Phawa– SSLC (MBOSE) 91.33%, ka Arwadaman Kiru Siangshai na Telangana State Board of Intermediate (HSSLC) Education, Hyderabad kawa ioh haduh 96.7%, ka Ewaka Medari Siangshai Higher Secondary Examination Higher Secondary HSSLC, Chennai- 82.5% kamjuh leh ya u Mewaki Manbha Siangshai (SSLC)– 84%.

Ha katai ka Dorbar Kur kawa pyllai da u President ka Seiñ Kur u Helping Phawa (Ex MDC) da yoh leh yei klam na u Sannio Siangshai, uwa man u General Secretary ka Seiñ Kur, u Careme Phawa u wa man u Joint Secretary ka Seiñ Kur, nalor kiwa klam kyrpang kitæ u Leo Sayer Siangshai wa u Deijuhi Siangshai.

Kitai ki ar ngut ki waheh kiwa da wanrah burom ya ka kur leh da klam ki ha kani ka dorbar kur wei da pynap ki yei sñiawngooh ya ka Seiñ Kur kiwa da tipmit yei chakri yong ki ha ka imlang ka sahlang.

U Pastor NS Phawa kam u kongsan da ong u wa da jooh pyrkhat u yow em ka Sein Kur Phawa Siangshai ha Khasi Jaiñtia yow em ya tipmit tipmat wei wow wanrah yei yatylli hapyrdi ka kur ka jait tangwa itæ waroh kut i kam cha yimphoo.

“E khublei O ya kiwa kitkaam ka Seiñ Kur kiwa da pynlang ya ki Kur ki Jait hadooh wow yoh i ya kam kani ka dorbar kur kawa chongchit chongkun”, ong u Pastor NS Phawa.

U Leo Sayer Siangshai, da sneiñ da kroo u ya ki kur ki jait deiwa ong u wa ymhoi u em i sñiaw niam, sñiaw yaphær Party hapoh ka kur khamtam heini i por wada jan bha ka Election MLA.

Hei klam yong oo ha katai ka yalang da ban joor u ya ka kur wa ymhoi u man ki ki bru kiwa arsap, kiwa chongkha khlem pyrkhat wa ymhoi leh u man ki bru kiwa swe kiwa tlot wa tlar yow ku  manbru hapoh ka kur ka jait hapoh ka imlang ka sahlang.

Ha katai ka yalang Kur da em leh ki chaad ki rwai na ki Seiñ Kur, Kyndongtuber, Nongjngi, Wahiajer, Ummulong, Wapungskur wa na kiwi kiwi ki seiñkur na ki unit wa ki chnong waphær waphær.

Kiwi tawon kiwa klam ha kani ka Dorbar kur toh u Careme Phawa, wa na kiwi kiwi.

Da pynhær ya ka lama chwa u sdang ka yalang da ka Beipun Ril Phawa- kawa tymmen tam hapoh ka kur wei wa da pynhiar ya ka lama kam ka dak wow pynkut ya kani ka dorbar da u kongsan.

Photos: Contributed by S. Siangshai

Advertisement ad1
Share this:
Previous

Ka 17 tarik ka yalang paidbah ki ar chnong wow pyrchah yei kyrriah ya ka C&RD Block na Wapung

Next

Poi ka tayaw 29th National Safety Week chawa kut ha Jowai