Wow yoh yei mon i khe ki Blai ki Syiem kamjooh wow yoh ki khon ki rayot ka Raij ka chnong yei chongsuk chongsaiñ, i miat i bha, i roi i paar liang wanang wa u bha u khoo u kba, ynne ka Raij Mynso da pyndep ko ya ka lehniam Behdieñkhlam Behkymphui.
Kani toh kawi na ki rukom lehniam wa da leh da pyndep chisien chisnem hapoh ka Raij Mynsoo da ki khon ka Niamtre.
Ha uni u snem ya kani ka lehniam næ ka kñia e ngooh da leh da pyndep ha ki le sngi iwa man nadooh ka 11 tarik wei da pyndep ya ka ynne ka sngi.
Ynne chwa u sdang ka lehniam da em ka yalang wa tbian heiwa u MDC ka JHADC, u Eveningstar Teron da man u kam u kongsan hei emlang u Dolloi ka Elaka Jowai, u Puramon Kynjing, kiwa ksohkaam niam ka Raij Mynso wa kiwi kiwi.
U Eveningstar hawa e i klam da e khublei Behkymphui u ya ki khon ka Raij Mynso heiwa da ong u leh wa emkaam wow yakhun ya iwa sih tam katni wa da ngat ki khynnah khynroo katni wei itæ toh i drugs.
Hadien ka yalang da pyndep ya ka lehniam ha Yung Langdoh da u Langdoh, u Pator wa kiwi kiwa da chim wow pynchong pynthiah ya ka lehniam hapyrdi ka pliang ka naar wa uwa suit wa choor iwa man katkam ka rukom wa pynjooh da sikai ki waheh na warim.
Hadien wa kut ka leh niam na Yung Langdoh, ki khon ka Niamtre hapyrdi i rah ya ki Sakymphui da mih ki na Yung Langdoh deiwa yah ya u Masi Kñia tymbut luti hadooh wa poi ka thaw lehniam wa tip kam ka Dieñyirngam.
Discussion about this post