Shillong: U Chairman ka High Level Committee (HLC) uwa man leh kam u Symbood Montri Rangbah ka jylla, u Prestone Tynsong da beiñ joor u ya ka seiñ ki mator kiwa thmu wow pynchit ya i jia yakhih ha Them Iewmawlong, iwa da jia nadooh ka 31 tarik u Naisan ha uni u snem.
Hawa yaklam wa u Prestone da ong u wa ka sorkar ym pdiang ko ya ki bru wa dang wan du chi sngi ar sngi khlem da tip ki iyi iyi wow batai stat ha kani ka jylla.
“Nadooh wa sdang nga da dep klam che O wa ki bru wa na baar ym toh u tuklar ware ki, ka sorkar daw leh ko ya ka kaam katkam wa da pynkup bor da ka riti synchaar ka ri. Toh u sangeh ki chi syndon ki ya i pynbaad iwa ktah yei sñiaw yong ki paidbah ka jylla,” da ong u.
Hei yatoh won wa i kam ka Harijan Panjayat Committee wa em i chah tympiah ka Show Room wa kawi ka truck nei yahkhih, neiliang u Prestone da kyntait u wa em kam itæ wei wot kiwa mihkhmat na ka National Commission on Human Rights leh ym em chem ki wa em kam itæ hei takit yong ki.
“Kini ki bru ki pyrchang ki wow pynchit ya ini i man hadooh katni, nga kyntu O ya kini ki bru wow sangeh chi syndon ya i kaam pynchit wei lada em kiyi kiyi toh u wan ki cha ka sorkar,” da ong u Prestone.
Kam wow pynkynmoo wa ki bru ka Harijan Panjayat Committee dang ha kini ki sngi wa dadep da lai rah dorkhat ki hakhmat u Lat, u Tathagata Roy wow dawa pyndooh ya ka bichaar ka High Level Committee. Neiliang u Chairman ka HLC da ong u wa ki ye ki wow yachem ya katwa ngait ki wei em ki ka hok tangwa ymtoh u pynchit.
“I kaam yong ka HLC toh wow pynbait noh syndon ya ki kynrum kynram wa mih na kani ka thaw, ka tæ wow kyrriah ya ki bru wow sah ha Them Iewmawlong. Lada ki ong wa i kyrriah man i pyrchah ya ka aiñ, ye ki u yakhun ha Kasari, ka sorkar leh ka smat ko wow lai cha ka yung bichaar.” da ong u.
Heiyatoh won wa i pynbna u Montri Rangbah ka Punjab, u Amarinder Singh wow e yarap T.60 lak, neiliang u Prestone da pyntip u wa ya kani ka kaam da chimkhia da u Montri Rangbah ka jylla, u Conrad K Sangma wow yaklam wa u CM ka Punjab.
Discussion about this post