U Montri Rangbah ka jylla, u Conrad Kongal Sangma da ong u wa ki paidbah ha khappood da chrai ki yei klam yong kiwa yahkhmat ka All India Trinamool Congress (AITC) kiwa da kular ya ki paidbah wow pyndam noh ya ka soskular (MoU) wa da ya soi neibynta wow pynbait pood ya ki 6 tylli ki thaw ha khappood wa ka Assam.
“Ynne ka sngi da poi O ha ki kattu katni ki thaw wa ya kajia pood wei nga da sñiaw O yei chrai ki paidbah ya ka TMC neibhah i klam pyrchah ya ka sorkar wa ya ka NPP kawa pyrchang wow pynbait ya u pood u ang,” da ong u Conrad deiwa pynrap leh wa ki paidbah ki chim ki wa ka TMC ka mut ko wow booh biang ya ki hei eh.
Da ong chooh chooh, “Iwa sñiawsih wow sñiaw ya ini i klam ka TMC, neibhah ki jooh ki bru wym leh iyi iyi wow pynbait ya u pood u ang ha i por wa em ki ha ka sorkar boon snem nachwa, katni hawa sdang wow pynbait wei da ye wow pynbait hadooh 6 tylli ki thaw wa ya kajia, wei du neidaw wa kwah ki wow pynkylla kaam Politics, mut ki wow knieh yei hok ki paidbah wow chongsuk ha ki thaw khappood.”
Hawa yatoh wa i booh ka UDP hapoh ka kular Election namo ‘Manifesto’ wow pait biang deiwa ya ka soskular khappood, u Conrad uwa man leh u National President ka NPP da ong wa man iwa sñiawsih wow yoo ya ka Party kawa embyntalang ha i yaklam wa ki Committee wow pynbait pood katni kam kini kiwa yahkhmat da pynkylla Politics ki yeini waroh.
