Shillong: U montri rangbah warim ka jylla, u Mukul Sangma ynne da pynbaad u wa ka sorkar Meghalaya Democratic Alliance (MDA) wa ka sorkar NDA da chukor ki ya ki paidbah kiwa kwah wow pynlait ya ka jylla na ki kyndon aiñ Mines and Minerals (Development and Regulations) Act wa kiwi ki aiñ yong ka sorkar pyrdi.
U Mukul, uwa man leh uwa yahkhmat yong ka liang pyrchah da klam u yeini hadien ka hukum ka Supreme Court wa kynthup ya uwa bichaar u Justice Ashok Bhushan wa u Justice K.M. Joseph, hajrong i khang ya u mooyong ha jylla da ka National Green Tribunal (NGT) ha ka 17 Naitung 2014.
Ha ka hukum ka Supreme Court da chah ko wow tih mooyong biang hapoh jylla tangwa emkaam wow bood ya ki kyndon ka aiñ MMDR Act, 1957 ka Mines Act, 1952 kamjooh leh ka Environment (Protection) Act, 1986.
Hajrong ka hukum, u Mukul da pynkynmoo u wa ka sorkar warim wa yahkhmat da ka Congress da tyrwa ko ya ka sorkar pyrdi hadien wa da chim ya ka rai ha ka yung dorbar chna aiñ namo ka Meghalaya Legislative Assembly ha u 2015 da kyrpaad ko wow pynlait ya ka jylla na ka aiñ Coal Mines (Nationalization) Act, 1973 wa ka MMDR Act, 1957.
Da ong u leh wa khnang wow yoh biang ki paidbah u tih mooyong, ka sorkar jylla ha u 2015 da kyrpaad ko ya ka sorkar pyrdi wow pynlait ya ka jylla na ka aiñ Coal Mines (Nationalization) Act wa ki kyndon ka Mines and Minerals (Development & Regulation) Act deiwa e ya ka Presidential Notification hapoh ka Para 12A(b) yong ka Sixth Schedule ka riti synchaar ka ri.
“Yeini da pdiang da ka Union Ministry of Coal hadien wa da yaklam da phyllu bha wot hadooh ka Committee wa yahkhmat da u Union Cabinet Secretary kawa da chna da u Prime Minister, u Manmohan Singh hadien wa kyntu O ya oo ha u 2014, ka wow kynthup ya ki Secretary na ka Ministry of Mines, Ministry of Coal, Ministry of Forest & Environment & Climate Change wa kiwi ki chnat ka sorkar pyrdi kamjooh u Chief Secretary ka Meghalaya,” da ong u Mukul.
Hawa beiñ ya ka sorkar MDA wa NDA u Mukul da kylli u, “Neiyi i daw wa ka sorkar jylla wa ka sorkar pyrdi kylla ktien ki haphrang ka Supreme Court wa waroh ki kyndon ka MMDR Act toh u krehkaam ki hapoh ka jylla? Iyi wow jia kattu hawa jrong wei chitom ka rukom yohbor khamtam ki tre thaw kiwa khian? Kattu daw boon i mih ki bru pyrdi (middle men) wa i pynchah (benami) kiwa daw ktah ya ki tre jylla. Kamtæ ye i wow ong wa ym em iyi iyi ha ka Sixth Schedule wow pynlait ya ka aiñ MMDR Act, 1957 ha ki thaw ri-loom ka jylla Meghalaya.”
Da pynbaad u leh wa ka sorkar MDA ym em pynkhreh ko lait nei wow yah bakla ya ka Supreme Court wa em palat 32 lak metric ton u mooyong wa da dep tih uwa neh ha ki soo district iwa ym jooh em “Ini pynyoo i wa daw joor i tih mooyong tooh.”
Discussion about this post