Chukor ka sorkar u Dr. Mukul ya kiwa sikai skur SSA hei yatoh wa ka tulop : JYF

Shillong: Ka seiñ Jaiñtia Youth Federation (JYF) da phylla ko hei yatoh wa i saam tulop ka sorkar jylla ya kiwa sikai skur SSA neibhah wa katkam ka jubab RTI wa yoh ko na ka sorkar jylla kamjooh na ka sorkar pyrdi man i iwa yaphær bak la bak.

Katkam ka jubab RTI wa yoh na ka Ministry of Human Resource Development (HRD), Department of School Education & Literacy da ong wa katkam ka poisa wa da pyllait wa ka bui yong ka yalang yong ka Project Approval Board ha u snem 2017-18, ka poisa wa T. 29829.39 lak da mang neibynta kiwa sikai SSA hapoh ka jylla Meghalaya.

Chooh chooh kani ka RTI da ong ko wa katkam ki kyndon krehkaam ka SSA, ka poisa toh u pyllait ar bynta (two installment) hapoh ka chi snem, itæ ha u Naisan (May) wa u Naikhynde namo Naichiphaw (September/October).

Ka sorkar pyrdi toh u pyllait ko ya ka Adhoc Grant ha u Naitung (April) man la u snem i wow pynbood won ya kawa sah yong ka bynta wa nyngkong wa kawa ar, ini won chong i hei rukom pynemkaam ya ka.

Related posts

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Ym pynyieñ kyrtong MDC ka KHNAM na JHADC

November 28, 2024

Neiliang u Socio & Economic Secretary ka seiñ, u Wanbun N. Dkhar da paan RTI u na u Deputy Director of School Education and Literacy, Meghalaya heiwa da jubab deiwa ong wa ya ka tulop kiwa sikai SSA da pyllait cha ki Account yong ki SSA District Unit Office, wei ini chong i hei poi ka poisa na ka sorkar pyrdi wa ka bhah (share) yong ka sorkar jylla.

U Deputy Director of School Education and Literacy, Meghalaya PRO da jubab u deiwa ong wa ka poisa wa yoh na ka sorkar pyrdi wa ka sorkar jylla wow pynkrehkaam ya ka scheme SSA ym jooh poi ko heipor wa biang.

Katkam ka jubab RTI won na u Deputy Director of School Education and Literacy, Meghalaya ong ko wa ki kyndon krehkaam ka SSA ong ki wa ka tulop kiwa sikai poi ko chisien le bnai (quarterly).

Ha iwi tawon i liang ka jubab RTI na ka HRD Ministry kdaw ko wa ym em u biang i poi ka Utilization Certificate wa da pynemkaam ya ka poisa wa da phah cha ki District, iwa pynsahteiñ ya ka wow pyllait nawon ya ka poisa wa dang sah.

U Dkhar da pyntip u leh wa i jubab na ka sorkar pyrdi ha ka 31 Wisu (March) 2017, da em hadooh 21, 756 ngut kiwa sikai SSA hapoh ka jylla Meghalaya.

U PRO ka jylla uwa man leh u Deputy Director of School Education and Literacy da ong u wa i daw wa slem u pyllait ya ka tulop kiwa sikai SSA toh neidaw wa ka sorkar pyrdi kamjooh ka sorkar jylla ym jooh biang i poi ka poisa ha ka Account ka State Project Office wei ka State Project Office ymye ko u leh iwon iwon leh hei yatoh wa ini.

Neiliang u President ka seiñ u Poipynhun Majaw da pynbaad u wa ka sorkar u Dr. Mukul Sangma hapoh ka jylla da chukor ko ya kiwa sikai SSA hapoh ka jylla.

Chooh chooh da ong u wa neiliang ka seiñ hi daw thoh ko cha ka sorkar pyrdi hei yatoh wa ini wei da kylli u leh wa kani ka poisa waroh chi kattu cheiwon wiar ko?