Shillong: Ka Confederation of Hynniewtrep Social Organisation (CoHSO) ynne ka sngi da dawa ko na ka sorkar wow pynpsiah ya ki kyndon ka Inner Line Permit ha ka Meghalaya Residents Safety and Security Act (MRSSA), 2016, wei neiliang u Symbood Montri Rangbah ka jylla, u Prestone Tynsong u da kular u wow pait bniah ya ka yumut wa pachat ki seiñbhalang.
“U Symbood Montri Rangbah da kular u wa ka sorkar u wanrah ko yei pynkylla ha ka MRSSA katkam i e yumut ka CoHSO heiyatoh wow pynpsiah ya ki kyndon ka ILP, wow khoom u kdoh yei wan psiah ki baar jyllai,” da ong u Robertjune Kharjahrin, uwa man kam u chairman ka CoHSO.
Da ong u wa katkam ki kyndon ka Bengal Eastern Frontier Regulation, 1873, wa toh wow pynpsiah ya ka MRSSA, kynthup ki neibynta wow kdoh ya ki bru kiwa na baar wow psiah ki chapoh Meghalaya (Prohibition of Outsiders), wei wow pynchitom katkam ki kyndon wa da booh ya ki bru wa tyngkheiñ ya ka aiñ deiwa psiah tooh chapoh jylla.
“U Prestone da kular u wow pynkylla ya ka MRSSA, 2016, chwa wow sdang ka dorbar mang tyngka ka wow man ha u Wisu, heiwa daw ye u wanrah yei pynkylla ya kani ka aiñ,” da ong u Kharjahrin.
Chooh chooh da ong u wa i dawa ya ka ILP man i ha waroh kawi ka jylla wei u krehkaam ko ym du hei pyrtuid tangwa ha i bor wa da pynkup ha ka hi.
Discussion about this post