Kam chibynta i lehkmen ya ka Environment Week, ka Social Forestry & Environment Wing, Meghalaya, Shillong deiwa ya krehlang waka Shillong Club, Department of Sociology, Lady Keane College waka Education Department ka NEHU da pynman ki yei thung dieñ Cherry Blossom ha Shillong Golf Course.
Da emlang u Montri ka chnat Forests & Environment ka jylla Meghalaya, u James P K Sangma kam u kongsan wei da chimbynta u hei thung dieñ deilang wa ki khynnah skur, ki sahep sorkar wa kiwi kiwi de.
U James hawa e yei klam da yaroh u yeini i thung dieñ harood kani ka Shillong Golf Course, deiwa ong leh emkaam u wanrah biang yei yirngam ha ini i bynta ka Shillong wei deiwa thung 1500 tylli ki dieñ Cherry Blossom daw phah ko ya ka khubor wa khlan bha wa emkaam wow chimkhia yei kylla ka suiñ bneiñ. Da ban joor u leh yei emkaam wow kheiñ ya man-ka-sngi kam ka Environment Day.
Da khana u leh wa ki thaw wa dang tymmoh da i khloo da duna i da 73 sq km hapoh ka jylla wei da emkaam wow sdang da waroh wow embynta wow yaleh pyrchah yei kylla ka suiñ bneiñ namo ka Climate Change. Da khana u leh wa ka sorkar ha kini ki le snem da pynkylla ko ym du wow pynkrehkaam ya ki aiñ tangwa wow wanrah da ki buit waphær yow leh yeini. Yow ye u leh yeini, da ong u wa ka sorkar da krehkaam lang ko wa kiwa chong chnong yow pynbait ya iwa eh deiwa e nongmuna yeiwa pynemkaam ya ka Phytoremediation Method yow pynkhooid ya ka wah Lukha deiwa pynemkaam da ki jait aitlen (Algea) kiwa ye wow pynkhooid ya i bih yow pynmiat biang ya ka wah.
Ha kani ka sngi da saam leh ya ka Meghalaya Excellence Award for Environment Protection cha u Tambor Lyngdoh uwa naka chnong Dongiewrim Mawphlang uwa da kreh yow yada wei wow pynneh pynsah ya ka ki khloo yong ki bru samen kamjooh leh yong ka chnong. Da e leh ya kani ka khusnaam cha ka Synjuk ki Hima Arliang Wah Umiam Mawphlang Welfare Society Dongiewrim Mawphlang yeiwa sdang ki ya ka seiñ hapoh ka chnong yow yada wei wow pynneh pynsah ya ka rymaw deiwa pynchlur wow pynemkaam da ki mar ki wym ktah ya ka rymaw. Kani ka khusnaam toh kawa wan deilang waka poisa T. 1 lak deilang waka Memento.
Da saam leh ya ki khusnaam cha ki khynnah skur kiwa jop ha ki yakob Drawing, Painting, Elocution wa Slogan Writing.
Kiwi de kiwa klam ha kani ka sngi toh u B K Lyngwa, Principal Chief Conservator of Forests & HoFF, u Hector Marwein, Director ka Shillong Club uwa da e ya ki ktien pdiang sñiawbha wa u W S Manners, Chief Conservator of Forests (Social Forestry & Environment) Meghalaya uwa da e ya ki kyntien e khublei.
