Jowai: Ynne i step ka 22 tarik, ki paidbah da lai dat moo ki yaka Mahendraganj Police Station, West Garo Hills hadien wa poor ka khubor wa siat ki pulit ya uwi bru paidbah haka miet ka 21 tarik wei ha ini i dat moo da piah ki yit ki kari kiwa kattu katni wa em ha pchem kani ka Police Station.
Neiliang ki pulit da pyntip ki wa haka miet ka 21 tarik heipor 08:30 uwi u bru uwa ym tipmit da knieh u ya ka suloi Insas Rifle yong uwi u pulit wa tip kam u CT Pini Sangma heiwpor wa dang lai sonteri (Patrolling) u deilang wa kiwi ki pulit ka Mahendraganj Police.
Hadien wa uni u bru da knieh u ya ka suloi da yut u na ini i thaw heiwa uwi u pulit da siat u ya uni u bru 6 kuli da ka Pistol u tangwa da yoh u wow yut wei ym pu em chem ya oo.
Ini da jia i hajan ka BSF BOP Mahenderganj Ex 26 Bn., wei da pyntip leh cha ki BSF chaphang uni u bru wei ki pulit leh da pynmaan ki yei thooh ya uni u bru ha kani ka thaaiñ khapood.
Ynne ka sngi won hadien wa chah pakhot moo ka Police Station, ki bor District da booh ki da ka Curfew ka wow neh hadooh 8 waje i step mynstep ka 23 Tarik wei da wan leh ki pulit na Tura wa na Ampati yow yarap.
Da em leh ka khubor wa ong kawa ym pu ye u pyntikna wa u bru wa knieh ya ka suloi u pulit toh uwa duna heipyrkhat pyrdaiñ wei ym tip wa mynsoo u næ ym em hawa siat ki pulit oo.
Update
Ka khubor wa dang yoh chooh chooh na u Asstt. Inspector General of Police (A), ka jylla Meghalaya da ong u wa ki pulit da lai ki cha kani ka thaw wa jia haka 21 tarik hadien wa yoh yutip ki wa em u bru wa duna hei pyrkhat uwa tip kam u Ahidul Islam (35 snem) uwa rah da ka wait wei da maham u wow pynmynsoo ya ki paidbah, wei manda manda poi ki pulit da dat u ki wei ha ini i jia uwi u pulit da toh pynhaap u ya ka suloi wei heipor wa mut u wow chim yaka suloi u da tlær u wei da haap u chapoh ka um wa em hajan kani ka thaw wa jia.
Kamtæ u Ahidul Isam da chim u ya kani ka suloi wei da yut u na kani ka thaw.
Da pyntip u leh u leh wa em hi i siat ya uni u bru tangwa ym em pynemkaam da ki kuli wei da leh da ka ‘Blank Firing’ yow pyntieñ ya uwa rah ya ka suloi yow lait u yut.
Chooh chooh won da ong u wa ki paidbah da sñiawthooh bakla wa siat ki pulit ya uni u bru kamtæ ynne i step heipor 11 waje da wan kær kut ki ya ka Mahendraganj Police Station wei da pakhot moo ki ya kari wa em ha pchem kani ka Police Station wei da toh ki kari ki wareh pulit kamjooh ka kari tympleh diñ ka Meghalaya F&ES.
Da ong u leh wa katkam wa man kattæ ka chnong ka thaw da man ko kawa jai jai wei ki sahep ka bor District da sah ki ha kani ka Police Station wei da kyntu u leh ya ki paidbah wa ym toh wow chim ya ka aiñ hei kti yong ki.
Discussion about this post