Williamnagar: Ka sorkar jylla da sdang ko sa kawi ka Scheme wa tip kam ka Rural Entrepreneurship Centre ka wow pynchlur ya ki bru wa seiñ khih cha ki thaiñ nongkyndong deiwa booh ya ki Rural Entrepreneurship Centres ha waroh ki block ka jylla. Kawa nyngkong dooh na kini ki Center daw sdang ha Nangapa hapoh ka Songsak C&RD Block, East Garo Hills heiwa u Montri Rangbah da wan booh moo-yurim u hei emlang ka Montri ka puræ puthi ka Deborah C. Marak ynnin ka 28 tarik.
Ya ka wai-mooyurim da pynman da ka tnat Commerce & Industries ha pchem ka skur St. Joseph’s Secondary School, Chidimit.
I thong kani ka Scheme toh wow e yarap ya ki warep, ya ki bru wa da seiñ khih kamjooh kiwa kwah u seiñ heiwa ha kini ki Centre daw em ki karkhana khian, ka crèche ya ki kynthai wa kwah u pyllai ka wa kiwi kiwi de heiwa waroh daw pynlut ka sorkar T. 305.79 Lak.
U Dr. Mukul da ong uwa kini ki Rural Entrepreneurship Centre man ki kiwa nyngkong dooh hapoh ka ri India ki wow yarap ya kiwa sah cha nongkyndong wow yei ki u pynku kyrdan yei rukom khih ko hadooh wow kynjoh i bor wa kiwi hapoh ka ri.
Da ong u leh wa da jied ya ka Nangapa toh neidaw wa ki warep kani ka thaiñ nadooh na chwa leh da pynkreh hok ki ya ki Scheme wa wan na ka tnat Agriculture wa Horticulture.
U Montri Rangbah leh da ood u yei wa suki palat u pynkreh ya ki kaam pynroi hapoh ka jylla ha kini ki snem wei da khut u ya ki tnat sorkar waroh wow kreh chitom ki. Kamtæ da ong wa daw wan ka poisa naka World Bank wow chna ya ki 181 tylli ki sarok hapoh ka scheme PMGSY.
Da pynsñiaw u leh yei sñiawkmen u waka skur St. Joseph da leh bha ki khynnah puræ ha ka SSLC Exam heiwa waroh da yoh ki ha ka 1st Division. U Principal ka skur u , Fr. Salnesh K. Marak da ong wa hadooh katni ka skur ym jooh yoh yarap poisa ko na ka sorkar, kamtæ ymye ki u yarap ya kiwa wan na ki manyung wa dooh wa duk deiwa e thaw puræ mynkna ya ki.
U Dr. Mukul da jubab u deiwa kular wow e T. 1 Klur yow chna Hostel naka scheme Rural Hostels For Students Scheme.
Discussion about this post