U Montri Rangbah ka jylla, u Conrad K Sangma ynnin da booh mooyurim u yow chna sa kawi ka madan Futsal sa ha Madan Shnong Playground, Lower Mawprem, deiwa emlang u Montri ka Sports & Youth Affairs, u Shakliar Warjri wa u Montri ka chnat, Tourism, u Paul Lyngdoh.
U Conrad hawa e yei klam da ong u wa ka sorkar toh kawa kreh neibynta i bha i miat ki khynroo khyllood wei ki kaam yalehke Sports toh kawi na kini.
“Ha ki snem wa da lai, da booh bhah Rs. 700 klur yow chna ya 300 tylli ki thaw yalehke wei 122 tylli toh kiwa da dep pynchna ha ki le snem wei daw chna leh 20 tylli ki madan Futsal ha kyllieñ ka jylla,” da ong u Conrad.
Da khana u leh wa ka sorkar lyngba kiwa boon ki kaam kam ka Skills Meghalaya, YESS Meghalaya, PRIME, CM Elevate wa kiwi kiwi toh kiwa da sdang neibynta ki khynroo khyllood. Chooh chooh da ong u wa daw chna leh yaka Mawkhanu Sports Complex heiwa da booh bhah Rs. 300 klur yow pynku ya ki kaam Sports hapoh ka jylla.
“Deiwa pyndep u chna ya ka Mawkhanu Sports Complex daw ye wow pynman ki yalehke wa ye u pdiang ya kiwa na kiwi ki bynta ka ri wei kamjooh leh na baar ri,” da ong u Conrad.
Da kdaw u leh wa lyngba ka STAR Program Talent Scouting daw pteiñ wow thooh ya kiwa em sap wow yalehke Sports wei wow pynman chiboon ki lympung yalehke kam chibynta wow pynkhreh yaka 6th Meghalaya Games kawa daw pynman ha Jowai wei kamjooh ki National Game wa daw pynman.
Discussion about this post