Shillong: Ka Indoor Stadium wa T. 22.75 klur ha chnong Mawbynna, Pomlakrai da booh ya u moo-yurim yong ka da u Montri ka tnat Urban Affairs, Arts and Culture, etc u Ronnie V. Lyngdoh hei emlang u MDC ka thaiñ u H.S. Shylla, ka Director ka tnat Sports and Youith Affairs ka Matsiewdor War Nongbri, u Working President ka Meghalaya State Olympic Association, u John F. Kharshiing, wa kiwi kiwi.
Ha kani ka sngi da yoh ya ki kyntien pdiang burom na u Secretary ka Pomlakrai Dorbar Pyllun uwa da e khublei leh ya ka sorkar jylla kawa da pyllait poisa wow chna ya kani ka Stadium. Heijooh i por da e khublei u ya u Montri Rangbah ka jylla u Dr. Mukul Sangma uwa da chimkhia wow pynku ya ki kaam yalehke sports kam wow pynkhreh leh ya ka National Games 2022.
Ka Matsiewdor War Nongbri da yaroh ko ya ki 6 tylli ki Dorbar Chnong kiwa hapoh ka Pomlakrai Dorbar Pyllun wa u Working President ka Meghalaya State Olympic Association, u John F. Kharshiing kiwa da chimkhia wow booddien wow chna ya kani ka Stadium kawa heh 50m x 24m. Ya kani ka Stadium daw chna deiwa yoh poisa na ka North Eastern Council wa ka sorkar jylla wei da booh por wow pyndep ya ka hapoh ar snem wei kawa ye leh hadooh 1700 ngut ki bru wow chong.
Kam u kongsan ha kani ka sngi u Ronnie V. Lyngdoh da ong u wa i chna ya kani ka Stadium kawa man kawi na kiwa nyngkong dooh kam kani hapoh ka jylla toh ka thong wa sdang da ka sorkar jylla hapoh i yahkhmat u Mukul Sangma.
Da pynksan u leh yeiwa emkaam heiwa waroh u man ki kiwa yakrehlang wa kiwa em bynta ha kani ka Stadium khnang wa kani ka thong u man ko kawa jop. Da e yaroh u leh ya ki chnong hapoh ka Pomlakrai Pyllun wa kynthup ya ka Umiew, Liewlong, Pdengshnong, Mawtharia, Mawbynna wa ki chnong ka Rngi Shyllong.
Kiwi kiwa da klam ha kani ka sngi toh u MDC ka Nongkrem u HS Shylla, u Working President ka MSOA u John F. Kharshiing, wa kiwi kiwi.
Discussion about this post