Da boon bnai khlem wai yaka yung krehkaam ka Lumshnong C&RD Block wym yoh tulop

Ka Jaiñtia National Council (JNC) hadien wa da yoo cha ki khubor wa ka C&RD Block Lumshnong man ko kawa khang bait da boon tylli ki bnai, kamtæ ynnin ka sngi neiliang ka seiñ hapoh i yahkhmat u Mebanteilang Sukhlaiñ, Information Secretary wa u Mehi Nongtdu, Sport Secretary da lai yachem ki markhmat wa u DC ka East Jaiñtia Hills wow kylli na iyi daw da pynman ya katai ka Block wow khang ko.

Hei yaklam wa u DC da khana u wa i daw toh wym yoh tulop kiwa kreh la 4-5 bnai wei kiwa kreh leh toh kiwa na jngai chnong te sangeh noh ki wow lai kreh. Da khana u leh wa em ar ngut kiwa kreh (Chowkidar, LDA) wei da em leh ki Engineer wa kiwi kiwa kreh hapoh yong ki.

Ka seiñ da dap ko da i sñiawkhia wow ap yeini wei da kylli ko leh wa lada toh neidaw wa jan ka Election tæ wanrah ya katai ka Block? Neibhah kam wow pynkynmoo wa ya katai ka Block da wai haka 05-12-22 hachwa ka Election MLA 2023.

Ka seiñ e ngooh ko leh yaka Santa Mary Shylla kawa da yaleh chitom wow wanrah ya katai ka Block wot ha kitu ki por dang man ko du kam ka kyrtong, kamtæ da kyntu leh yaka kam ka MLA wow leh ko iyi re iyi neibhah kattæ da em ko hei bor hapoh sorkar kamwa da yaleh chitom ko wow wanrah wei kattu wow pynbha pynmiat yow lait nei sepai.

Related posts

Khut ka UDP-West Jaiñtia Hills ya kiwa kwah u yaleh MDC cha ka JHADC

November 25, 2024

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

Da kyrpaad leh wow khut thung kreh noh hapoh ka Block yow e myntoi ya ki khynroo thooh kreh yong ka thaaiñ Narpuh, da ong u Mebanteilang.

Neiliang u DC da kular u leh wow phah Wyrta cha ki bor wa chaneiñ wei da kular u wow leh pyn ha uni u bnai wow wan yow wai biang ya katai ka Block.

Ka seiñ phah ko leh ka kyrwoh cha ka sorkar wym toh u leh mylliñ hi-eh ko yei bha i miat ka thaaiñ Narpuh wei ymtoh leh u pynbiej paidbah du wow yoh myntoi ha ki kaam Politics neibhah chisien wa da wai ya kawon kawon ka chnat toh u man ko leh kawa krehkaam wow e yei chakri hok.

Ka seiñ kyntu ko leh ya u Abu Taher Mondal, Montri ka chnat C&RD wow leh u iyi re iyi neibynta katai ka Block wow lai pait u leh dei khmat khnang wa katai ka Block u man sakhiat ko kawa lai bait kamwa da angnood ki paidbah ka thaaiñ Narpuh.

Ka seiñ daw booddien ko leh lada jia wa kani ka kaam ym man ko kawa mihsoh, pynkut u Mebanteilang Sukhlaiñ.